Umani ng atensyon sa social media ang Facebook post ng infectious disease doctor na si Edsel Salvana, health columnist ng Manila Bulletin, matapos niyang mapatanong kung saan isinagawa ang umano'y DNA analysis sa namayapang dating opisyal ng Department of Public Works and Highways (DPWH) na si Catalina Cabral.
Sa kaniyang Facebook post nitong Linggo, Disyembre 21, diretsahang nagtanong si Salvana kung saan umano ipinadala ang DNA sample ni Cabral para sa pagsusuri.
Aniya, base sa mga ulat, lumabas umano ang resulta sa loob lamang ng wala pang 48 oras—isang bagay na ikinagulat niya bilang isang scientist.
Gamit ang hashtag na "nagtatanong lang," sinabi ng kolumnista na kung ganoon daw pala kabilis, baka raw puwedeng doon na rin ipadala ang kanilang mga research samples upang mapabilis ang mga proyekto.
'He served his country well!' Rep. De Lima, nagluksa sa pagpanaw ni Rep. Romeo Acop
Ayon pa sa kaniya, karaniwan umanong inaabot ng halos dalawang linggo bago bumalik ang resulta ng kanilang DNA tests, kahit pa raw ito ay para lamang sa short reads ng virus.
"Anyone know where they sent USec. Cabral's DNA for analysis? If what was reported is accurate, they got the results back in less than 48 hours? Not insinuating anything but if they really were able to sequence that fast, can we send our samples to whoever did the analysis so we can make our research projects go faster? Usually takes 2 weeks for our stuff to come back, and that's with short reads for viruses #nagtatanonglang," aniya.
Sa addendum naman ng kaniyang post, ipinaliwanag ni Salvana na posible namang magawa sa ganoong kabilis na panahon ang PCR-RFLP testing, ngunit mangangailangan ito ng isang high-volume laboratory na may malawak na karanasan.
"Addendum: PCR-RFLP can probably be done in that time frame but it would have to be a high volume lab with extensive experience and they would need to run several comparisons. On a weekend. Let's see if they make the report public," aniya pa.
Photo courtesy: Screenshot from Edsel Salvana/FB
Umani naman ito ng iba't ibang reaksiyon at komento mula sa netizens.
"First question also sa bilis ng DNA testing nila"
"Its probably not her…tagong tago eh…."
"I thought the family didn't want the DNA test..."
"Why do they need DNA when there are dental records & fingerprints?"
"My triiibe! We've watched too many true crimes, Doc! Tsk! Don't us talaga, di ba?!"
"Was wondering the same thing, even with a dedicated molecular lab"
"So true.. 2 weeks min for result yayyy"
Samantala, matatandaang iniulat na ang bangkay na narekober sa Kennon Road sa Tuba, Benguet noong Disyembre 18 ay kinilalang kay Cabral batay sa autopsy results.
Kaugnay nito, iniutos ng Department of Justice sa National Bureau of Investigation sa Cordillera Administrative Region na magsagawa agad ng autopsy kay Cabral dahil sa tinukoy nitong “suspicious circumstances surrounding her death.”
Kaugnay na Balita: Dating DPWH Usec. Cabral, pumanaw matapos mahulog umano sa bangin
Gayunman, batay sa mga ulat noong Sabado, Disyembre 20, nilinaw ni Randulf Tuaño, hepe ng National Police Public Information Office, na hindi kasama ang DNA testing sa isinagawang proseso ng pulisya upang matukoy kung kay Cabral nga ba ang bangkay.
Ang DNA testing ay siyentipikong pagsusuri na ginagamit upang matukoy o ikumpara ang genetic material ng isang tao.
Karaniwan itong ginagawa upang makilala ang pagkakakilanlan ng isang indibidwal, matukoy ang relasyon sa pamilya, o magsilbing ebidensya sa mga kasong medikal at kriminal.
Sa pamamagitan ng DNA testing, naihahambing ang mga sample gaya ng dugo, buhok, o tissue upang makakuha ng tiyak at maaasahang resulta.
Kaugnay na Balita: PNP, pokus na sa imbestigasyon ng mga isyung nauugnay kay ex-DPWH Usec. Cabral
