Inanunsyo ng Philippine Olympic Committee (POC) na sina Tennis standout Alexandra “Alex” Eala at Alas Pilipinas Men’s Volleyball star Bryan Bagunas ang magsisilbing flag bearers ng Pilipinas sa opening ceremony ng 2025 Southeast Asian (SEA) Games.
Sa isang pahayag, sinabi ng pangulo ng POC na si Abraham Tolentino na lumikha ng marka sina Eala at Bagunas sa pandaigdigang larangan ng isports, kung kaya’t sila ang “best choice” bilang flag bearers ng bansa.
“Popularity aside, Alex and Bryan have made impacts in the global sports community, and that makes them the best choice to carry the flag in the SEA Games,” saad ni Tolentino.
“It’s about the inspirational appeal, the motivation and hard work that reaps accomplishment that make an athlete or athletes the best choice for the chore,” dagdag pa niya.
Si Eala ay nakilala sa larangan ng tennis matapos umugong ang kaniyang pangalan at pagkakapanalo sa iba’t ibang tennis tournament sa mundo tulad ng Miami Open, French Open, at US Open.
Ranking ng Pilipinas, patuloy pagratsada sa 33rd SEA GAMES 2025
Nakamit din ni Eala ang kauna-unahan niyang Women’s Tennis Association (WTA) 125 title sa Guadalajara noong Setyembre.
Samantala, umukit naman ang kasaysayan si Bagunas matapos buhatin ang Alas Pilipinas Men’s Volleyball Team sa “historic win” nito kontra sa Egypt sa nagdaang “FIVB World Championship” noong Setyembre.
Gaganapin ang 2025 SEA Games sa darating na Disyembre 9, sa Bangkok, Thailand.
Vincent Gutierrez/BALITA
