Mabilis na inaprubahan ng Senado ang ₱27.3 bilyong pondo ng Office of the President para sa 2026, nitong Miyerkules, Nobyembre 26, 2025. 

Inihain ni Senate Majority Leader Juan Miguel “Migz” Zubiri ang mosyon na ituring na isinumite ang badyet ng OP at ng Presidential Management Staff (PMS), matapos magmosyon si Senator Jinggoy Estrada na suspendehin ang interpellation bilang paggalang sa institusyon.

“Mr. President, this representation wishes to move for the termination of the interpellation budget of the Office of the President as a show of institutional courtesy to a co-equal branch of the government and to the President of the Republic who also happens to be a former colleague, a member of this August chamber during the 15th and 16th Congresses,” ani Estrada.

Inaprubahan ni Senate President Vicente “Tito” Sotto III ang mosyon matapos walang senador na tumutol.

National

Palasyo, itinangging pang-optics, propaganda lang ang Anti-Dynasty bill

Samantala, personal namang dumalo sa Senado si Executive Secretary Ralph Recto upang katawanin ang OP.

Matatandaang si Sen. Sherwin Gatchalian ang nagprisinta ng panukalang ₱27.3 bilyong badyet ng OP at ₱854 milyong pondo ng PMS para sa susunod na taon.

Noong Setyembre 8, sa bisa ng botong 56-5, naunang iratsada ng House of Representatives at inaprubahan ang naturang hiling na pondo ng OP.

Humihingi umano ang tanggapan ng Pangulo sa Kongreso ng budget na ₱27.28 bilyon para sa fiscal year 2026, kung saan 72% umano ang pagtaas nito mula sa kasalukuyang taon na budget na nasa ₱15.8 bilyon.

KAUGNAY NA BALITA: Botong 56-5: Budget ng OP, aprubado ng House Appropriations Committee

Batay sa isinapublikong dokumento ng Department of Budget and Management (DBM) para sa 2026 National Expenditure Program (NEP), umabot ng ₱1,018,304,000 bilyon ang nakalaan para sa foreign at local visits ng opisina ni Pangulong Ferdinand "Bongbong" Marcos, Jr. 

Kumpara noong 2025 NEP, naglalaro lamang ang state visit budget ng OP noon sa ₱982,649,000.

Matatandaang minsan nang inihayag ni Labor Secretary Bienvenido Laguesma na tinatayang nasa 200,000 trabaho raw ang nabuksan para sa mga Pilipino matapos ang foreign visits ni PBBM.

KAUGNAY NA BALITA: ₱1.018 bilyon, laan sa 2026 budget ng local, foreign trips ng Office of the President