Kinumpirma ni National Bureau of Investigation (NBI) Director Jaime Santiago na tinanggap na umano ng Palasyo ang kaniyang ipinasa niyang irrevocable resignation.
Ayon sa isinagawang flag ceremony ng NBI nitong Lunes, Oktubre 27, ibinahagi ni Santiago sa kaniyang mga kasamahan na pormal na umanong tinanggap ni Pangulong Ferdinand “Bongbong” Marcos, Jr., ang kaniyang irrevocable resignation.
“Today, I want to inform you that the President [has] finally accepted my irrevocable resignation,” pagsisimula ni Santiago.
Pagpapatuloy ni Santiago, sigurado raw na magkakaroon ng bagong order para sa papalit sa kaniya bilang NBI director.
Middle forces, Marcos bloc kailangang magkaisa para 'di manalo Duterte bloc sa 2028—Antonio Trillanes
“So within the day or these day to come, lalabas na ang order, magkakaroon na kayo ng panibagong leader[...] But definitely, ang order will come out within the day, tomorrow, or basta within the week,” ani Santiago.
Nagawa ring sumaludo ni Santiago sa publiko kahit daw sa huli pagkakataon.
“Maraming salamat sa inyo. Hayaan ninyong sumalado ako sa inyo sa huling sandali,” pagtatapos pa niya.
Samantala, hindi naman isinapubliko ni Santiago kung sinong opisyal ang papalit sa kaniyang pwesto bilang NBI Director.
Matatandaang kinumpirma na rin ng Palasyo ang pagbibitiw ni Jaime Santiago sa puwesto noong Agosto 16, 2025.
Nakasaad umano sa liham ni Santiago na nag-ugat ang pagbibitiw niya dahil sa “orchestrated move” na nagtatangkang dungisan ang reputasyon niya.
Aniya, “Detractors and those who have a sinister interest in my position incessantly make moves to blemish my reputation.”
“I cannot allow this seemingly orchestrated move to blacken my reputation, which I have built through the years,” dugtong pa ng dating director.
Gayunman, hindi na pinangalanan pa ni Santiago kung sino ang nasa likod ng tinutukoy niyang “orchestrated move.”
Mc Vincet Mirabuna/Balita
