Inisa-isa ni Mamamayang Liberal (ML) Party-List Rep. Leila de Lima ang mga dapat umanong taglayin ng susunod na Ombudsman.
Ayon sa naging panayam ng ABS-CBN News Channel (ANC) kay De Lima nitong Martes, Oktubre 7, 2025, sinabi niyang dapat umanong makitaan ng kawalan ng takot ang susunod na mapipili ni Pangulong Ferdinand “Bongbong” Marcos, Jr., na mamumuno sa nasabing ahensya.
“Ang kailangan ng Ombudsman ngayon, ‘yong tunay na Ombudsman. As envisioned by the constitution,” panimula ni De Lima.
“Proactive, truly independent, walang takot, walang sinasanto maging sinoman ‘yan. ‘Yan ang ini-envisioned ng constitution,” pag-iisa-isa pa niya.
Middle forces, Marcos bloc kailangang magkaisa para 'di manalo Duterte bloc sa 2028—Antonio Trillanes
Nagawa ring ihalimbawa ni De Lima ang “kawalan” umano ng tapang, puso, at lakas ng loob ni dating Ombudsman Conchita Carpio-Morales.
“Magaling ka nga, maganda ang record mo in terms of integrity, irreproachable, in corruption [ay] you’ve never been involved in any graft issue. Pero kung wala kang puso, walang lakas ng loob, wala kang sapat na tapang katulad ni Ombudsman Conchita Carpio-Morales ay you will be falling short of an ideal Ombudsman,” paggigiit pa ni De Lima.
Matatandaang isinumite na ng Judicial and Bar Council (JBC) sa Malacañang ang opisyal na listahan ng mga indibidwal na maaaring pagpilian ni PBBM na susunod na Ombudsman.
MAKI-BALITA: Listahan ng pagpipilian ni PBBM sa pagka-Ombudsman, ipinadala na sa Palasyo
Noong Lunes, Oktubre 6, 2025, pormal na inilabas ng JBC ang shortlist ng mga kandidato sa pagka-Ombudsman kung saan kabilang sa mga ito si Department of Justice (DOJ) Sec. Jesus Crispin Remulla.
"Pursuant to Article VII, Section 9 of the Constitution, the Judicial and Bar Council (JBC) has the honor to submit the following nominations for the position of OMBUDSMAN, Office of the Ombudsman...," anang JBC.
Narito ang iba pang mga nominado maliban kay Remulla:
1. Ex-COA at ngayo'y PCC Chairperson Michael Aguinaldo
2. Retired Court of Appeals justice Stephen Cruz
3. Supreme Court Associate Justice Samuel Gaerlan
4. Deputy Executive Secretary Atty. Liza Logan
5. Retired Supreme Court justice Mario Lopez
6. Sandiganbayan Justice Michael Musngi
Mc Vincent Mirabuna/Balita
