Tuluyang binawian ng buhay ang isang apat na taong gulang na lalaki matapos umano itong pagbuhatan ng kamay ng girlfriend ng kaniyang ina sa Barangay Lankaan 2, Dasmariñas Cavite noong Biyernes ng madaling araw, Abril 4, 2025.
Ayon sa ulat ng ABS-CBN News noong Sabado, Abril 5, isang Overseas Filipino Worker (OFW) ang ina ng biktima kung kaya’t naiwan ito sa pangangalaga sa karelasyon nito.
Sa panayam ng media kay Police Captain Polly Podios, Chief Investigation ng Dasmariñas Police, ang tiyuhin ng biktima ang tumestigo at nag-report sa kanila sa nangyari sa biktima.
“Yung nanay ay nasa ibang bansa so yung bata ay inihabilin sa partner. Actually ang nag-report ay tiyuhin ng bata. Nakatira sa iisang bahay kung saan bandang alas otso ay nag-inuman itong suspect at kapatid ng isang reporter natin,” ani Padios.
2 taong gulang na bata, patay matapos madamay sa away ng kaniyang ina at stepfather
Dagdag pa niya, “Nagsara siya [tiyuhin] ng gate nung natapos ang inuman, tapos nakarinig siya ng iyak ng bata. Doon sa pag-iyak ng bata, sinilip na lang niya sa may bintana sa kwarto ng biktima natin kung saan nakita yung suspect na pinapalo itong biktima.”
Bandang 3:00 ng umaga nang mapansin umano ng suspek na hindi na umano huminga ang bata.
Lumalabas sa imbestigasyon ng pulisya na nagtamo nang magkakaibang pasa sa ulo ang biktima kung saan napag-alaman ding may mga kagat sa iba’t ibang bahagi ang bata maging sa maselang bahagi ng kaniyang katawan.
Makailang beses na raw nagsumbong sa ina ng bata ang kanilang mga kaanak sa tuwing minamaltrato ang bata hanggang sa nangyari ang krimen.
Nasa kustodiya na ng pulisya ang suspek na nahaharap sa kasong murder.
