April 03, 2025

Home BALITA Probinsya

Street sweeper sa Tacloban City, sinaksak dahil sa selos; patay!

Street sweeper sa Tacloban City, sinaksak dahil sa selos; patay!
Photo courtesy: (Contributed photo)

Dead on arrival na nang maisugod sa ospital ang isang 50 taong gulang na street sweeper sa Tacloban City matapos saksakin ng isang lalaki sa Tacloban City noong Martes, Abril 1, 2025. 

Ayon sa ulat ng News5 nitong Miyerkules, Abril 2, katrabaho ng biktima ang suspek. Lumalabas sa imbestigasyon na selos umano ang pinagmulan ng motibo ng pananaksak. Nahagip ng CCTV sa lugar ang pananaksak ng suspek sa biktima habang nakatalikod ito at nagtatrabaho. 

Makikita sa CCTV footage na dahan-dahang sinundan ng suspek ang biktima hanggang sa makahanap ng pagkakataong itarak ang patalim na kaniyang bitbit. Agad na rumesponde ang mga awtoridad sa insidente at natagpuan ang nakaupong biktima habang nakatusok ang kutsilyo sa likod. 

Nagawa pa umanong mabigkas ng biktima sa mga rumespondeng pulis ang pangalan ng suspek hanggang sa tuluyan siyang mawalan ng malay.

Probinsya

'Mass poisoning?' Tinatayang 20 alagang hayop sa Albay, hinihinalang nilason nang sabay-sabay

Samantala, nasa kustodiya na ng Tacloban Police Station 2 ang suspek na nahaharap sa kasong murder.