Naloka ang mga "Eat Bulaga" hosts na sina Maine Mendoza, Miles Ocampo, at Ryan Agoncillo sa isang Indianong contestant ng kanilang segment na "Foreignoy: The Afam Invasion" matapos makapagbitiw ng mura, sa Wednesday live episode, Abril 2.
Tinanong kasi ni Maine ang contestant na si Rahul Singh kung ano-ano ang mga natutuhan niyang salitang Tagalog sa mga kaibigang Pilipino habang nasa Pilipinas, dahil walong taon na siyang naninirahan sa bansa.
Saad ng Indiano, "Tinuturo sa akin ang dami, halimbawa, put*ng-in* mo!" walang kagatol-gatol na sabi ng contestant.
Naging maagap naman ang hosts na humingi ng tawad sa televiewers dahil hindi raw alam ni Rahul na masama pala ang ibig sabihin nito.
'Reserving my peace' post ni Mayor Mark Alcala, inokray dahil sa grammar
Humingi naman ng tawad ang Indiano subalit hindi sinasadyang mabigkas niya ulit ang salita. Aniya, hindi raw niya kasi alam na foul words na pala ang sinasabi niya dahil hindi niya alam ang kahulugan nito.
Muli naman siyang inawat ng hosts at binago na lamang ang usapan.
Kahit na nagmura, hindi naman nalotlot si Rahul at naka-tie pa ang isang contestant.
Nagpaalala naman ang hosts na sina Maine at Ryan sa mga kababayang Pilipino na mag-ingat sa mga itinuturong salita sa mga dayuhang naninirahan sa bansa.
Nakaabang naman ang mga netizen kung bibigyan ng kaukulang warning ng Movie and Television Review and Classification Board (MTRCB) ang noontime show.
