Patay ang isang miyembro ng Special Action Force (SAF) matapos barilin sa ulo ng kapwa SAF personnel sa kanilang quarters sa Barangay Tara, Sipocot, Camarines Sur noong Martes ng umaga, Abril 1, 2025.
Ayon sa ulat ng 103.1 Brigada News FM-Naga City noong Martes, nag-ugat ang hindi pagkakaintindihan ng suspek at biktima dahil umano sa labada. Lumalabas sa imbestigasyon na hindi umano nagustuhan ng biktima nang pagsabihan siya ng suspek na huwag maglaba sa kanilang banyo dahil may iba pang gumagamit nito.
Agad umanong nanuntok ang biktima, dahilan upang kuhanin ng suspek ang kaniyang long service firearm at pinaputukan ang biktima. Napag-alaman ding parehong nakatalaga ang dalawa sa 92nd Special Action Company ng 9 Special Action Battalion.
Samantala, binawian ng buhay ang biktima matapos siyang magkritikal habang ginagamot sa ospital. Nasa ilalim naman sa restrictive custody ang suspek habang gumugulong ang imbestigasyon at nahaharap sa kasong murder.
