Inendorso ng doctor-vlogger at umatras na senatorial candidate na si Doc Willie Ong ang tumatakbo sa pagkasenador na si Bam Aquino.
Sa kaniyang Facebook post noong Lunes, Marso 31, makikita ang mga larawan nina Aquino at Ong habang magkahawak ng kamay at nakataas ito.
“'Sinusuportahan ko ang kandidatura ni Senator Bam Aquino dahil sa kaniyang adbokasiya para sa libreng edukasyon. Taos sa puso ko ang habambuhay na misyon ko na maging doktor para sa lahat ng Pilipino, at ganoon din si Senator Bam Aquino sa pagiging Senador para sa lahat ng Pilipino," pagbabahagi ni Aquino sa naging pahayag ni Ong para sa pagkandidato niya bilang senador.
"Maraming salamat, Doc Willie, sa iyong tiwala, suporta, at malalim na malasakit at pagmamahal sa bayan! Timi and I are lucky to call you and Doc Liza our friends. Masayang masaya ako na makita kang bumabalik ang sigla."
"We’re praying for your fast and complete recovery, and strength for Doc Liza, and the entire family. God bless, Doc! PARA SA BAYAN!" pahayag pa niya.
Kasama rin sa isa sa mga larawan ang misis ni Doc Willie na si Doc Liza.