Sugatan ang isang siyam na taong gulang na bata matapos umano siyang barilin sa dibdib ng tatay ng kaniyang nakaaway na bata.
Batay sa ulat ng Unang Balita ng GMA network nitong Huwebes, Pebrero 20, 2025, nagsumbong umano ang kaaway ng biktima na kaniyang nakasuntukan.
Sa panayam din ng media kay Police Lieutenant Jose Tamingo ng Navotas Police, kasama umano ng suspek ang kaniyang barkada nang komprontahin ang batang biktima.
"Nagkaroon ng away 'yung mga bata. Nagkaroon ng suntukan at tadyakan. Isang bata nagsumbong sa magulang, sa tatay actually at saka sa mga barkada ng tatay niya," ani Tamingo.
'Mass poisoning?' Tinatayang 20 alagang hayop sa Albay, hinihinalang nilason nang sabay-sabay
Dagdag pa ni Tamingo, "Kinompronta yung dalawang bata. Bumunot ng baril yung magulang ng nakaaway nila. Tapos yung pangunahing witness natin tinutukan sa ulo. Tapos yumuko lang yung bata. Pumutok yung baril, ang tinamaan yung victim natin ngayon, tinamaan sa dibdib."
Agad na nahuli sa manhunt sa operation ang mismong gun man matapos siyang ituro ng isang menor de edad na nauna niyang tutukan ng baril. Bigo namang matimbog ng pulisya ang dalawa pa niyang kasamahan.
Dumipensa rin ang suspek na aniya'y nadala lang umano siya ng galit nang makita ang kaniyang anak na umiiyak.
"Yung anak ko po umuwing umiiyak. Siyempre po bilang tatay, nabigla po ako. Pinuntahan ko nga po yung mga bata. Ang problema po, yun nga, medyo napasobra. Sobrang galit po. Hindi ko po inaasahan na gano'n ang mangyayari. Hindi ko po talaga sinasadya po yun. Hindi ko po talaga gusto," anang suspek.
Nahaharap sa reklamong frustrated murder ang nahuling suspek habang nagpapagaling na sa ospital ang biktima.
