Nagkomento si Sen. Imee Marcos hinggil sa malawakang kilos-protestang ikinasa ng iba’t ibang grupo sa EDSA, kaugnay ng impeachment cases laban kay Vice President Sara Duterte.
Sa pamamagitan ng ambush interview nitong Biyernes, Enero 31, 2025, inihayag ni Sen. Imee na sang-ayon daw siya sa posisyon ng kaniyang kapatid na si Pangulong Ferdinand “Bongbong” Marcos, Jr. sa pagtutol nito sa impeachment laban kay VP Sara.
“Well mukha namang sinabi na at sang-ayon ako kay Pangulong Bongbong, sa aking ading na huwag na ituloy ‘yan kasi panggulo ‘yan sa ating bansa. Eh talagang talagang nagkakahidwaan,” anang senadora.
Nilinaw din ni Sen. Imee na pinanghahawakan pa rin daw niya ang UniTeam bagama’t sumasama na rin umano ang kaniyang kalooban.
Mga taong simbahan, dapat kasama sa mga laban ng bayan —Sister Mary John Mananzan
“Para sa akin, syempre ako ‘yong pasimuno noon ng unity. Kahit papaano isinisigaw ko pa rin kahit na sumasama ang loob ko, at binabanatan ako, eh sinisigaw ko pa rin. ‘Isang bansa, isang diwa!’ Sabi ni Apo Lakay, eh talagang ‘yan pa rin ang solusyon sa ating mga problema. Kaya sundan natin si Apo Bongbong na huwag ng mag-impeachment kasi watak-watak na tayo, magkakaroon pa ng watak-watak,” saad ng senadora.
Matatandaang maka-ilang beses ng iginiit ni PBBM na hindi raw niya suportado ang pagsulong ng ilang mambabatas ng impeachment cases laban sa pangalawang pangulo.
KAUGNAY NA BALITA: PBBM, iginiit na 'waste of time' lang pag-impeach kay VP Sara
Samantala, sa kabila nang tindig ng pangulo sa impeachment case kay VP Sara, nilinaw naman ng Palasyo na hindi hinaharangan ni PBBM ang naturang impeachment complaints kung sakaling tuluyang umusad ito.
KAUGNAY NA BALITA: PBBM, hindi hinaharangan impeachment complaints vs VP Sara – Malacañang
