Dead on arrival ang isang babaeng pasaherong tumalon mula sa jeep na hinoldap sa kahabaan ng Commonwealth Avenue noong Miyerkules ng gabi, Enero 29, 2025.
Ayon sa ulat ng Umagang Balita, kasama ang nasawing biktima sa mga pasaherong tumalon mula sa naturang jeep matapos mangholdap ng isang lalaki gamit ang kutsilyo.
Batay sa panayam ng media sa ilang saksi, nauna raw tutukan ng suspek ang nasawing biktima kung saan nakuha ang kaniyang bag. Matapos ang pangyayari ay agad umanong tumulan sa jeep ang biktima na agad na nawalan ng buhay.
Samantala, mula sa naiulat pang limang pasaherong tumalon sa nasabing jeep, tatlo sa kanila ang nagtamo umano ng minor injuries habang dalawa ang nagkaroon ng maselan na physical injury.
'Pekeng survey' sa Maynila, binatikos ng Manila LGU officials at mga mambabatas
“Ang ikinamatay daw po ng babae, sa sobrang takot daw po sa holdaper, tumalon daw po habang tumatakbo yung jeep nang mabilis. So... nabagok siya," ani Patrolman Francis Steve Fontillas ng Quezon City Task Force Disiplina.
Dagdag pa ni Fontillas, "Bitak yung ulo ng isa. Yung isa naman sumusuka ng parang dugo-dugo. Yung tatlo, parang medyo minor injuries lang naman."
Na-corner din umano ang suspek matapos niyang subukang tumakas sa crime scene at agad na kinuyog ng ilang residente sa nasabing lugar.
Inamin din ng suspek ang ginawang krimen na nahaharap sa reklamong robbery with homicide and physical injuries.
"Dami ko na pong kasalanan sa pamilya ko. Nawalan po ako ng trabaho. Tama lang bayaran ko yung nagawa kong kasalanan," anang suspek.
Nasa kustodiya na ng Criminal Investigation and Detection Unit (CIDU) ang suspek.
