Binigyang-pugay ng lider-manggagawang si Atty. Luke Espiritu si Albay 1st district Representative at Liberal Party President Edcel Lagman na pumanaw na nitong Huwebes, Enero 30.
Nitong Huwebes ng gabi nang ianunsyo ng anak ni Lagman na si Tabaco City Mayor Krisel Lagman ang pagpanaw ng kongresista sa edad na 82 dahil daw sa cardiac arrest.
BASAHIN: Albay 1st district Rep. Edcel Lagman, pumanaw na
Kaugnay nito, sa isang Facebook post ay sinabi ni Espiritu na nalagasan ang bansa ng isang “maabilidad, matino, at makataong lider” sa pagpanaw ni Lagman.
Romualdez, inalala dedikasyon ni Lagman para sa ‘human rights, good governance, social justice’
“Pamamaalam at pagpupugay kay Ka Edcel Lagman.
“Sa panahong namamayagpag ang mga payaso, trapo, at dinastiya na mga walang laman na kahit ano, nalagasan tayo ng isang maabilidad, matino, at makataong lider na isinulong ang karapatang pantao at ang kapakanan ng mga manggagawa, kababaihan, at masa,” ani Espiritu.
“Pakikiramay sa buong pamilyang Lagman at sa mga nakasama ni Ka Edcel,” saad pa niya.
Kilala si Lagman sa pagsusulong ng reproductive health law at pagtataguyod ng mga panukalang batas ukol sa human rights at gender equality. Kasama rin siya sa mga pangunahing may-akda ng Absolute Divorce Bill.
BASAHIN: LP kay Lagman: ‘Mananatili kang tanglaw sa laban para sa mas makatarungang Pilipinas’
