Naniniwala si Manila 3rd district Rep. Joel Chua na sa panahon daw ngayon ay wala nang nananalong politiko sa eleksyon na "walang kahit papaanong panggastos."
Sa isinagawang Machra's Balitaan sa Harbor View nitong Martes, Enero 28, kung saan nagsilbi silang guest speakers ni Manila 2nd District Rep. Rolan Valeriano, sinabi ni Chua na hindi naman daw siya pumasok sa politika na “butas-butas ang damit.”
“Natatawa ako dahil one time, pinicturan yung relo ko, pinublish. Yung relong pinublish nila, bigay ng tatay ko. Hindi na lang ako nagsasalita kasi syempre, unang-una, kung gusto ka naman talagang siraan, sisiraan ka. And modesty aside, hindi naman po kami pumasok dito na butas-butas yung damit namin,” ani Chua.
“Kumbaga huwag na tayong maging plastik, wala namang mananalo rito kung wala kang kahit papaanong panggastos. Kahit na barangay captain yata ngayon, kapag hindi na gumastos hindi na rin mananalo eh, unless siguro artista ka, basketbolista ka na medyo kilala ka. Pero kung hindi ka naman kilala, paano ka mananalo kung wala kang panggastos?” saad pa niya.
59% ng mga Pinoy, kuntento sa performance ng PBBM admin – SWS
Sinabi rin ng mambabatas na hindi naman daw sila mananalo ni Valeriano kung wala silang nagawa bilang mga mambabatas.
“Kung kami kasi ni Cong. Rolan ay wala namang nagawa, siguro hindi naman kami makakailang termino bilang konsehal at hindi naman kami mananalo bilang congressman. Kasi yung mga tao naman sa Manila, more on opinionated eh, more on thinking-voters naman eh,” ani Chua.
“So tingin ko ako, isa sa mga dahilan din kung bakit din ako naiboto is because of my credentials. At bilang isang abogado, siguro naniniwala naman sila sa kakayahan natin sa Kongreso na magagawa po natin,” saad pa niya.
Parehong reelectionists sina Chua at Valeriano bilang congressman ng kani-kanilang distrito sa Maynila sa 2025 midterm elections.
