Bangkay na nang matagpuan ang anim na taong gulang na lalaki sa isang ilog sa Tabogon, Cebu, 9 na araw matapos siyang maiulat na nawawala.
Ayon sa mga ulat, natagpuan umano ang mga labi ng biktima noong Biyernes, Enero 17, 2025, na halos nabubulok na. Ang ama ng biktima ang nagkumpirma ng pagkakakilanlan ng naturang bangkay na malapit sa isang ilog, batay sa suot nitong shorts.
Batay sa salaysay ng kaanak ng biktima, kasama ng biktima ang kaniyang ama bago siya tuluyang mawala. Nag-aabang lamang daw ang dalawa sa dadaang nagtitinda ng isda, ngunit nalingat daw ang tatay ng bata. Ito na ang huling beses na nasilayan nilang buhay ang biktima.
Patuloy na inaalam ng mga awtoridad ang nangyari sa biktima at kung sino ang suspek sa likod ng nangyari sa bata. Nakatakda na ring isalang sa autopsy ang bangkay ng bata upang matukoy ang sanhi ng pagkamatay nito.
