Nagtamo ng third degree burn ang isang 84 taong gulang na lola matapos siyang pagtangkaang sunugin ng buhay ng kaniyang lasing na manugang.
Ayon sa ulat ng GMA Regional TV noong Martes, Enero 7, 2025, nangyari ang naturang krimen sa Carcar, Cebu kung saan isang lola ang sinabuyan daw ng gasolina at saka sinilaban ng kaniyang manugang habang siya raw ay naglalaba.
Saksi ang 11 taong gulang na anak ng suspek sa karumal-dumal na sinapit ng kaniyang lola matapos umano siyang utusan ng kaniyang ama na i-video ang pangmamaltrato rito.
“Kumuha ng cellphone si Papa, ibinigay niya sa akin. Sabi niya kunan mo ng video si lola mo. Iyon nag-uusap sila tapos may kinuha siya sa bag niya, tumbler na may gas. Naamoy ko ang baho ng gas,” anang anak ng suspek.
Tatlong magkakapatid, magkakasunod umanong sinapian ng masamang espirito?
Lumalabas sa imbestigasyon ng pulisya na dati raw may hidwaan ang biktima at ang suspek na siya raw naging motibo nito upang pag-initan ang matanda.
“Itong suspek saka yung victim meron na silang previous grudges. Kasi ayon sa suspek, bini-brainwash niya daw nung lola yung asawa niya. Then later on sinabi ng suspek na hindi yata umuwi sa bahay yung misis niya,” saad ni Police Lieutenant Colonel Ruel Burlat, hepe ng Carcar City Police.
Samantala, nasakote na ng pulisya ang suspek kung saan tahasan daw nitong iginiit ang kaniya umanong hinala na sinisiraan daw siya ng biktima sa kaniyang asawa kung kaya’t hindi na raw ito umuwi sa kanila.
Dumipensa naman ang anak ng suspek at iginiit na naglayas daw ang kaniyang ina dahil umano sa pananakit ng kaniyang ama. Nagpahayag din ng galit ang naturang apo ng biktima.
“Hindi siya [suspek] mapapatawad. Nakakaawa ang lola ko, matanda na yun pa ang ginawa, walang respeto,” anang bata.
Nahaharap ang suspek sa reklamong frustrated murder.
