Usap-usapan ang umano'y social media posts ng anak ng komedyanteng si Richie D'Horsie o Ricardo Reyes sa tunay na buhay, na si "Alexis John Reyes" na pumapalag daw sa direktor na si Darryl Yap, sa paggawa nito ng biopic movie ng pumanaw na "softdrinks beauty" noong 80s na si Pepsi Paloma.
Kumakalat ang screenshot ng umano'y Facebook post ng isang nagngangalang "Alexis John Romero" na anak daw ng komedyante, na tila umaalma sa "The Rapists of Pepsi Paloma" kung saan isa sa mga magiging karakter dito ay ang amang yumao, na gagampanan ng theater actor na si Andres Balano, Jr.
Mababasa sa screenshot na ibinahagi ni Alexis ang pagpapakilala ni Direk Darryl kay Andres bilang gaganap sa katauhan ng kaniyang ama.
Post ni Alexis, "[Mura] Darryl yap Patay na tatay ko nanahimik na. ano yan gagawan mo ng pilikula tatay ko wala kang permisyo saming pamilya ah [mura] tigilan nyo tatay ko."
MMFF 2024, extended hanggang Enero 14!
Bukod dito, usap-usapan din ang umano'y Instagram story naman niya kung saan makikita ang larawan ng isang law firm.
Batay rito ay mukhang nagsadya ang anak ng pumanaw na komedyante sa nabanggit na law firm at kumonsulta sa abogado kaugnay sa isyu.
Mababasa sa caption, "Meeting muna Daddy Richie D' Horsie ikaw na bahala sakin ah, lalaban ako para sayo hindi ako aatras ayoko bastusin ang pangalan mo Daddy."
Makikita ang screenshots na ito sa entertainment site na "Fashion Pulis," at usap-usapan naman sa "Reddit."
Hinanap naman ng Balita ang Facebook account na "Alexis John Romero" na sinasabing nagpakilalang anak ni Richie D'Horsie subalit walang makitang ganitong account.
Ang makikita lamang ay "Alexis John Reyes," at batay sa description, nakalagay ang "Son of late Comedian Richie D Horsie."
Naka-lock din ang kaniyang profile kaya hindi ito basta-basta masisilip ng hindi niya friends o followers.
Samantala, wala pang tugon, reaksiyon, o pahayag ang kampo ni Darryl Yap tungkol dito.
MAKI-BALITA: Vic Sotto, trending matapos mabanggit sa teaser ng 'The Rapists of Pepsi Paloma'
MAKI-BALITA: Netizens, curious kung lulusot sa MTRCB ang 'The Rapists of Pepsi Paloma'
