Hindi pa rin pala natatapos ang pang-iintriga sa naging hirit ni Unkabogable Star Vice Ganda tungkol sa natanggap niyang award sa naganap na 50th Metro Manila Film Festival (MMFF) Gabi ng Parangal noong Biyernes, Disyembre 27.
Ilang content creators daw ang tila "naninisi" kina Lorna Tolentino at Dennis Trillo dahil hindi agad nila nabasa ang description ng "Special Jury Citation" award na iginawad kay Vice Ganda.
Sila kasi ang presenters ng award ng Unkabogable Star.
Matatandaang humirit ng biro si Vice Ganda na hindi niya alam kung para saan ba ang award na ipinagkaloob sa kaniya ng MMFF.
Di na alam salitang love life: Piolo 13 years na palang single, bakit kaya?
“Pagtayo ko tinatanong ko si Direk Jun saka si Uge, ‘Ano ba ‘tong award na ‘to?’ Special jury citation, for what? For best dressed of the night? Special jury citation for best performance, gano’n ba ‘yon? So, salamat po,” natatawang sabi ni Vice na ikinatawa na rin ng audience.
“Seriously, hindi ko talaga alam. Magtatanga-tangahan ako, ayoko namang magpasalamat dito na hindi ko naman naiintindihan ‘yong award…”
Maya-maya ay binasa na ni Dennis ang description na nakalagay pala sa cue card.
Samantala, sa ulat naman ng Philippine Entertainment Portal o PEP, natanong nila ang panig ni Lorna tungkol sa nabanggit na insidente. Aware daw si LT sa mga negatibong komento laban sa kaniya sa social media dahil pinadadalhan daw siya ng ilang fans ng posts tungkol dito. Pinalalabas kasi ng content creators na parang banas siya kay Vice sa naging hirit nito sa nabanggit na award.
Paliwanag ng award-winning actress, si Dennis daw dapat ang magbabasa ng description subalit pangalan lang ang nabasa ng aktor.
Nakita na raw ni LT ang description subalit sadly, hindi nga raw nabasa ni Dennis. Naiintindihan naman daw ni Lorna dahil baka sumusunod lang ang aktor sa instructions sa kaniya.
Noong humihirit na raw si Vice tungkol sa award na natanggap niya, kaagad naisip ni Lorna na dapat basahin ang nakasulat sa papel para malinaw na ito sa lahat.Kaya para daw mas maliwanagan si Vice Ganda, ipinakuha ni LT ang papel at pinabasa iyon kay Dennis.
Sey naman ni Lorna, naiintindihan naman niya ang naging reaksiyon ni Vice Ganda dahil hindi naman talaga kasi malinaw kung para saan ba ang special jury citation na natanggap niya.
Anyway, wala pa namang tugon, reaksiyon, o pahayag sina Dennis at maging si Vice Ganda tungkol dito.
MAKI-BALITA: Vice Ganda sa kaniyang Special Jury Citation award: 'Award for what?'
