Matapos humupa ang "cheating issue" nina Maris Racal at Anthony Jennings dahil sa pagsisiwalat ng ex-girlfriend ng huli na si Jam Villanueva sa screenshots ng kanilang mga "landiang” lumikha ng eskandalo, panibagong pasabog na screenshots na naman ng mga sweet na pag-uusap ang pinupulutan ngayon sa social media, lalo na sa X.
Sa pagkakataong ito, sangkot sa isyu ang negosyanteng si "Philip Laude," mister ng socialite-vlogger na si Small Laude, matapos isiwalat umano ng isang babaeng nagngangalang "Precious Larra Su" sa kaniyang Instagram account ang screenshots ng umano'y mga naging usapan nila ni Philip, kaya mahihinuhang tila may namamagitan sa kanilang dalawa.
Base sa mga kumalat na convo, makikita sa mga ibinalandrang screenshots ang tila pagbibigay-assurance ng umano'y si Philip na wala siyang ibang mahal kundi ang hinihinalang mistress, na ipinagpapalagay ng mga nakabasang netizens, na walang iba kundi ang nag-upload ng screenshots na si Precious. Mahihinuha sa usapan na may pinagseselosang ibang babae si Precious na tinawag sa pangalang "MJ."
Batay pa sa convo, sinabi ng umano'y si Philip sa kaniyang "Love" na hindi siya makikipaghiwalay sa kaniya, at wala itong dapat ikaselos kay MJ na kaibigan naman ng nagngangalang "John Ling," na tinawag pang "dugyot" at "maitim."
Karanasan ni BJ Pascual kay Kristine Hermosa, naungkat dahil kay Denise Julia
Mababasa rin sa screenshots na tila nagkakalabuan na raw ang relasyon ng umano'y si Philip kay "S," na ipinagpalagay naman ng mga netizen na tumutukoy sa kaniyang misis na si Small. Kung pagbabatayan ang mga mensaheng ipinadala ng umano'y si Philip, tila sinasabi ng negosyante na hindi na niya mahal ang misis dahil hindi umano pinahahalagahan ang mga ibinibigay niya, nilalait pa siya, at kailanman ay hindi siya pinuri.
Batay sa nabanggit na screenshots, mababasang tila sinasabi ng umano'y si Philip na hindi na siya masaya sa piling ng kaniyang asawa, at matagal nang nais makipaghiwalay, subalit iniisip lamang ang kapakanan ng mga anak at masasabi ng Chinese community tungkol dito. Naniniwala raw siyang hindi aksidente ang pagtatagpo nila ng kaniyang "Love" na mahal na mahal daw niya.
Makikita naman sa ilang screenshots ang mga larawan ng umano'y si Philip habang tila nakikipag-video call sa kaniyang umano'y mistress, at ilang larawan kung saan kasama niya ang nabanggit na babae.
Sa iba pang convo, makikitang tila galit na galit ang umano'y si Philip nang siya naman ang magselos sa kaniyang mistress dahil tila nahuli niyang may iba pang lalaki ito bukod sa kaniya. Mababasa ang iba’t ibang mura ng umano’y si Philip laban sa kaniyang mistress, na tila pinararatangan niyang nakikisiping sa iba.
Agad naman itong pinutakti sa social media at kaniya-kaniyang bigay ng reaksiyon at komento ang mga netizen. May mga nagsabing tila malaking eskandalo ito kapag lumaki lalo't prominenteng pamilya sa mundo ng negosyo ang sangkot. Ngunit marami rin ang mga nagsasabing hindi sila naniniwalang totoo ito, at baka biktima lamang ng fake news ang mister ni Small.
Pinagbatayan ng mga netizen ang naging paraan ng paggawa ng mensahe ng umano'y si Philip sa chat, na tila hindi raw magagawa ng isang kagaya niyang Inglesero at elitista. Halatang-halata raw na tila gawa-gawa lamang ito ng isang "commoner" na nag-iimbento ng pekeng posts para gumawa ng intriga at kontrobersiya.
"Ang tanga naman ng ngimbento neto. 1) hindi naman ganyan magtxt ang mga alta and ultra rich. Apaka cheap. 2) Chinese po si Philip Laude, napaka galing naman nya mg compose in tagalog. Haha!"
"parang hindi naman kapanipaniwala to, parang jejemon naman magsalita si philip "
"Mukhang may makakasuhan ng slander dito"
"huh? bakit parang tambay sa kanto makipagusap "
"Hmm parang fake hahahaha parang pang kanto yung message ni philip eh"
"Parang teenager lang nagsulat haha."
Habang isinusulat ang artikulong ito ay burado na ang post ni Precious at hindi na rin mahanap ang kaniyang Instagram account, subalit tila huli na ang lahat, dahil nakapag-screenshots na ang mga marites na netizen at ito na ang pinagpipiyestahan sa social media, lalo na sa iba't ibang social media pages.
Ilang netizens pa ang naghalungkat ng lumang vlog ni Small kung saan makikita ang umano'y mistress ng mister na nakaupo lang mismo sa harapang mesa nila, habang kumakain sila matapos mag-shopping sa isang mall.
Pinagpipiyestahan naman ito ng mga netizen sa social media platform na “Reddit.”
“This vlog was from 2022. They were shopping at Rockwell, and the mistress was literally seated right in front of their table,” mababasa sa caption ng netizen na nag-share nito sa nabanggit na social media platform.
May ilan ding nakapagkalkal ng mga umano'y larawan ng nabanggit na babae na kasa-kasama ang aktor-politikong si Richard Gomez at anak nitong si Juliana, subalit hindi naman kumpirmado kung ano ang koneksyon niya kay Goma.
Wala pang reaksiyon, tugon, o pahayag ang kampo ni Philip o ni Small Laude tungkol sa isyu, maging ang nag-upload ng screenshots na si Precious. Bukas ang Balita sa kanilang panig.
