Nakapagtala ng bagong Guinness World Record ang bayan ng San Rafael sa Bulacan noong Sabado, Disyembre 14, para sa “Largest Gathering of People Dressed as Angels” matapos mapantayan at malampasan ang rekord ng Canada noong 2015.
Sa pangunguna ni Mayor Mark Cholo Violago, mahigit 2,000 San Rafaeleños ang nagtipon-tipon sa Victory Coliseum suot ang kanilang mga angel costume upang makuha ang nasabing titulo. Ang dating rekord ay naitala sa Winnipeg, Canada na may 1,275 kalahok.
Sa Facebook post ni Mayor Mark Cholo Violago noong Linggo, Disyembre 15, inihayag niya ang kaniyang kagalakan at pagpapasalamat sa mga San Rafaeleños at maging sa lahat ng mga nakiisa sa kauna-unahang Guinness World Records Attempt na nagbihis ng angel costume.
“Nag-uumapaw po ang aking galak at pasasalamat sa mahigit 2,000 Anghel na San Rafaeleños at sa lahat ng mga nakiisa sa kauna-unahang "Guinness World Records Attempt" na ito sa kategoryang ‘Largest Gathering of People Dressed as Angels.’ Kayo po ang dahilan ng ating tagumpay! Tunay na nagmarka tayo ng kasaysayan sa ating mahal na Bayan, at sa buong mundo. Pagbati sa mahal kong Bayan, San Rafael!” ani Mayor Violago
#BalitaExclusives: Kilalanin mga imbentor ng Walking stick with GPS and sensor para sa visually impaired
Kinumpirma ng Guinness World Records adjudicator na si Kazuyoshi Kirimura na nalampasan ng San Rafael ang dating rekord at opisyal na ibinigay ang sertipiko kay Mayor Violago.
Ang pagtatangkang ito ay bahagi ng taunang Angel Festival na iniaalay kay San Rafael Arkanghel, ang patron ng bayan. Ayon sa lokal na pamahalaan, layon nitong ipalaganap ang pagkakakilanlan ng bayan ng mga anghel at ang kanilang pagkakaisa.
Sa pangunguna ng lokal na pamahalaan at aktibong pakikilahok ng mamamayan, muling naisulat ang pangalan ng bayan ng San Rafael sa pandaigdigang kasaysayan bilang Bayan ng mga Anghel at bagong Guinness World Record holder.
Mariah Ang
