Tuluyang sinampahan ng Kapuso singer-actress na si Rita Daniela ng reklamong “acts of lasciviousness” ang aktor na si Archie Alemania.
Ayon sa ulat ng GMA News, nitong Miyerkules, Oktubre 30, 2024, nag-file ng formal complaint si Rita sa Office of the City Prosecutor sa Bacoor City, Cavite.
Trauma raw ang dinanas ni Rita na siya rin umanong nagbigay sa kaniya ng lakas ng loob upang tuluyang magsampa ng reklamo, bagama’t alam daw niya na makakaladkad ang kaniyang reputasyon.
“That being a public figure, a contractual artist with reputation to protect, it is very difficult for me to file the instant case but the trauma I was and am experiencing brought about by the incident gave me courage to face the consequences and file the instant case against the respondent,” ani Daniela sa media.
JC De Vera, na-offend sa 'biro' ni Alex Gonzaga
Batay sa pagsasalaysay ng GMA News, nangyari daw ang naturang harassment ni Archie sa aktres noong Setyembre nang minsan daw alukin ng aktor si Rita na ihatid pauwi.
Pareho silang galing sa thanksgiving party na ginanap sa bahay ng co-star nilang si Bea Alonzo sa seryeng “Widow’s War.” Pareho silang cast member ng show pero sa ngayon, wala na sa istorya ang karakter ni Archie.
Habang nasa daan daw sila pauwi, ay nauna na raw hawakan at haplusin ni Archie ang leeg at balikat ng aktres, na ayon kay Rita ay labag umano sa kaniyang pahintulot at kagustuhan.
Dagdag pa sa nasabing salaysay, maka-ilang beses umano siyang sinubukang nakawan ng halik ni Archie, bagama’t sinubukan daw niyang manlaban nang hilahin siya nito at yakapin, bago pa man daw siya tuluyang makababa ng sasakyan nito.
Samantala, kasama rin umano sa isinamang ebidensya sa isinampang reklamo ni Daniela ang screenshot ng kaniyang mensahe kay Alemania, kung saan iginiit niyang nabastos aniya siya, sa ginawa ng naturang aktor.
Wala pang inilalabas na pahayag si Alemania, hinggil sa kinasangkutang reklamo.
Kate Garcia
