Inihayag ng Philippine Atmospheric, Geophysical and Astronomical Services Administration (PAGASA) nitong Sabado, Mayo 11, na ang shear line at easterlies ang kasalukuyang nakaaapekto sa bansa.
Sa tala ng PAGASA kaninang 4:00 ng madaling araw, inaasahang makararanas ng maulap na kalangitan na may kalat-kalat na pag-ulan at thunderstorms ang Isabela and Aurora bunsod ng shear line o ang “boundery line” kung saan nagsasalubong ang malamig at mainit na hangin.
Pinag-iingat ang mga residente sa mga nasabing lugar sa posibleng pagbaha o kaya nama’y pagguho ng lupa tuwing magkakaroon ng malalakas na pag-ulan.
Ayon kay PAGASA Weather Specialist Aldczar Aurelio, inaasahan namang hindi na makaaapekto ang shear line mamayag gabi o bukas, Mayo 12.
ALAMIN: Mga sintomas ng heat-related illnesses at mga dapat gawin kapag nakaramdam nito
Samantala, magiging mainit pa rin daw ang panahon sa Metro Manila at mga natitirang bahagi ng bansa dulot ng epekto ng easterlies, o ang mainit na hanging nagmumula sa karagatang Pasipiko, at ng localized thunderstorms. Sa kabila nito ay may posibilidad pa rin ng mga pulo-pulong pag-ulan at thunderstorms sa naturang mga lugar pagsapit ng hapon o gabi dahil na rin sa epekto ng localized thunderstorms.
Sa kasalukuyan ay walang binabantayan ang PAGASA na alinmang bagyo o low pressure area (LPA) sa loob o labas ng Philippine area of responsibility (PAR).
