Inaasahang magpapaulan ang trough ng low pressure area (LPA) at northeast monsoon o amihan sa malaking bahagi ng bansa ngayong Lunes, Enero 29, ayon sa Philippine Atmospheric, Geophysical and Astronomical Services Administration (PAGASA).
Sa tala ng PAGASA kaninang 4:00 ng madaling araw, malaki ang tsansang makararanas ng maulap na kalangitan na may kalat-kalat na pag-ulan at thunderstorms ang Caraga at Davao Region dulot ng trough ng LPA.
Pinag-iingat ang mga residente rito dahil sa posible raw pagbaha o kaya nama’y pagguho ng lupa tuwing magkakaroon ng malalakas na pag-ulan.
Malaki naman ang tsansang magdadala ang amihan ng maulap na kalangitan na may katamtamang mga pag-ulan sa Cagayan Valley, Cordillera Administrative Region, Aurora, Quezon, Bicol Region, at Eastern Visayas.
Matapos rebelasyon ni Garma: Ex-Pres. Duterte, dapat nang kasuhan – Rep. Castro
Bukod dito, posible umanong magdulot ang amihan ng medyo maulap hanggang maulap na kalangitan na may kasamang isolated light rains sa Metro Manila at mga natitirang bahagi ng Luzon at Visayas.
Wala namang matinding epekto ang mga magiging pag-ulan sa naturang mga lugar.
Samantala, inihayag ng PAGASA na maliit na ang tsansang may mabuo o pumasok na bagyo sa Philippine area of responsibility (PAR) sa pagtatapos ng buwan ng Enero.
