Iginiit ni House Speaker Martin Romualdez na “walang basehan” ang akusasyon ng pinsan niyang si Senador Imee Marcos na nag-alok siya ng ₱20 milyon kada distrito kapalit ng pirma ng taumbayan para sa People’s Initiative (PI) campaign.

"That is baseless. Siguro kausapin n’yo na lang siya, nagma-marites siguro, nakikinig sa mga marites," ani Romualdez sa isang press briefing nitong Biyernes, Enero 26.

"I'd like her to prove it and–you know, she has the proper means and ways. She can go to whatever court, or the Comelec (Commission on Elections) to prove it.

"Kasi marites lang lumalabas sa Senate eh. A lot of speculation. We leave it up to them," he said,” saad pa niya.

Imee, ipinagdiinang si Romualdez umano ang nasa likod ng PI campaign

Nito lamang ding Biyernes ay sinabi ni Senador Marcos na kumbinsido raw siyang si Romualdez ang nasa likod ng PI campaign.

“Definitely, ‘yung opisina niya ‘yung nag-alok ng ₱20 million kada distrito, definitely nanggaling sa kanila yung very attenuated timeline na July 9 tapos na ang lahat,” ani Marcos.

Bukod dito, nauna nang iginiit kamakailan ni Senador Ronald “Bato” dela Rosa na isang kongresista raw ang nagsabi mismo sa kaniya na ang House leader ang nasa likod ng nasabing PI campaign.

Itinanggi naman ni Romualdez kamakailan ang naturang “alegasyon” ni Dela Rosa.