Isinapubliko ng Ninoy and Cory Aquino Foundation (NCAF) sa kanilang website ang 19 na talumpati ni dating Senador Benigno “Ninoy” S. Aquino, Jr.

Ito ay bahagi umano ng paggunita sa ika-91 na kaarawan ni Ninoy na pinaslang noong Agosto 21, 1983.

“To celebrate the life and legacy of Ninoy, 19 of his speeches are now available online on ninoyspeeches.ph,” saad ng organisasyon sa kanilang Facebook page.

Ang mga tampok na talumpati sa nasabing website ay nauna nang ilathala sa librong “A Garrison State in the Make and other Speeches”, koleksyon ng mga talumpati ni Ninoy na binigkas niya sa pagitan ng 1968 at 1972.

Kasama sa mga libreng mababasa ng publiko ang “Operation Sagittarius”. Ang kahuli-hulihang talumpati na binigkas ni Ninoy sa senate floor bago siya arestuhin at ipakulong. Tungkol ito sa planong pagpapatupad umano ni Marcos ng Batas Militar sa buong bansa.

Narito ang iba pang pamagat ng talumpati na mababasa sa website: “A Carrot and a Stick for Mr. Marcos”, “A Garrison State in the Make”, “Jabidah! Special Forces of Evil?”, “The Bridge of San Juanico: Mr. Marcos’ Folly”, “A Pantheon for Imelda”, “When Law and Order Went Amok”, “Alternatives on our Economic Crises”, “The Tragedy of Tarlac”, “Mr. Marcos and Congress – A Black Cabal”, “Black Saturday, Plaza Miranda”, at “Liberty Shall Not Rest!”