Sumalang si Kapuso actress Sanya Lopez sa “Pick and Talk” ng “Fast Talk with Boy Abunda” nitong Huwebes, Nobyembre 2.
Ang kailangang gawin, pipili siya sa pagitan ng dalawang aktor na lilitaw mula sa LED screen at ipapaliwanag ang naging batayan ng kaniyang pagpili dito.
Unang lumitaw sa screen ay ang mga aktor na sina Alden Richards at Joshua Garcia. Tila nahirapan siyang pumili sa dalawa pero sa huli ay si Joshua ang kaniyang pinili.
“Kasi si Joshua parang noong una ko siyang nakita sa ‘Unbreak My Heart’ nila. Sa isang mall. Very genuine and parang kinausap niya ako. Parang kasama niya ‘yung mga relatives niya…Siya ‘yung lumapit sa akin para sabihin niya sa akin na puwede pong magpa-picture ‘yung family ko. Sabi ko, oo naman ‘no. parang ako pa ‘yung nahiya sa kaniya,” paliwanag ni Sanya.
Marcoleta, pinigilang magtanong tungkol sa proposed ₱6.352-trillion 2025 nat'l budget
Dagdag pa niya. “So ‘yung pa lang parang feeling ko, magiging okay kami ‘pag magkasama. Parang wala kaming dull moments.”
Natigilan naman bigla si Sanya nang biglang sabihin ni Tito Boy na iba umanong humalik si Joshua.
“Parang hindi ko pa naman po na-try,” natatawang sabi ni Sanya.
Matatandaang naging usap-usapan sa social media ang halikan nina Jodi at Joshua sa kanilang serye. Sa katunayan, kamakailan lang ay ibinahagi ni Jodi ang karanasan niya sa pakikipaghalikan sa aktor.
MAKI-BALITA: ‘Matapos kina Janella, Jane!’ Joshua, hinigop si Jodi
MAKI-BALITA: Jodi Sta. Maria sa ‘higupan’ nila ni Joshua Garcia: ‘It was great’
Sunod namang pinagpilian ni Sanya ay ang mga aktor na sina Ken Chan at David Licauco. Pero si Ken ang pinili niya sa dalawa. Ang paliwanag niya, matagal na umano niyang kaibigan ito.
“Kilalang-kilala ko na siya. Noong ‘Walang Tulugan’ pa lang po namin, kami na ‘yung sobrang close. Parang halos lahat yata wala akong maitago kay Ken Chan, e,” saad pa niya.
Pero hindi pa roon natatapos ang pagpili ni Sanya dahil kailangan pa niyang pumili ng isang bet niyang maka-date mula sa dalawang pinili niya.
“Kanino ka papayag makipag-date? Kay Ken Chan o kay Joshua Garcia? That’s pick and talk,” sabi ni Tito Boy.
Sa huli, pinili pa rin ni Sanya si Joshua dahil marami na umano siyang alam tungkol kay Ken kumpara kay Joshua. Kaya gusto pa niyang mas makilala ang aktor.
“Gusto ko siyang makilala. Paano ba siya sa tunay na buhay? ‘Yung bilang tao hindi bilang artista. Nakilala kasi natin si Joshua parang very mysterious guy,” ani Sanya.
Pero sa kasalukuyan, habang isinusulat ang artikulong ito, wala pang anomang tugon, reaksiyon, o pahayag si Joshua hinggil dito.
