Patok sa netizens ang larawang ibinahagi ni Corazon Bautista o “Heartlove Bautista” sa isang Facebook online community nitong Sabado, Setyembre 16.

Makikita kasi sa larawan na hindi lang isa at hindi rin dalawa, kundi labintatlong magkakahilerang pusa ang sabay-sabay kumakain sa kanilang bahay.

“Thank you sa dalawang pinsan ko na tumulong sakin magpakain Sa mga cats ko☺️☺️ sleep pa kasi anak ko😅😅😅😅” saad ni Corazon sa kaniyang post.

Sa eksklusibong panayam ng Balita, ikinuwento ni Corazon ang karanasan sa pagkakaroon ng maraming pusa sa kanilang bahay.

“Masaya po magkaroon ng mga pusa sa bahay. Mayroon din po akong dalawang aso. Nakakawala po sila ng stress. Awa naman po ng Diyos, kahit magastos po, di po kami kinakapos sa mga needs nila ng food.”

Nagsimula lang umanong mag-alaga ng pusa si Corazon noong magkaanak siya. 2014 noon. Pero natural na raw sa pamilya nila ang maging mapagmahal hindi lang sa pusa kundi pati sa mga aso. Sa katunayan, may alaga rin daw pusa ang dalawang tita niya.

“Natural na po samin ang mapamahal sa mga cat and dog. Kahit ano pa pong animals siguro. Lahat naman po sila may karapatang mahalin.”

May mensahe rin umano si Corazon sa kaniyang mga kapuwa fur parents:

“Sana ipagpatuloy lang po natin ang pagmamahal sa mga alaga natin or sa kahit na stray pa sila. Di man natin sila ma-adopt lahat or di man natin mapakain silang lahat lalo na yung stray, sana wag na lang po natin silang saktan.”