Ang latest online series ni dating Hashtags member Wilbert Ross na "Ang Lalaki sa Likod ng Profile" na hatid ng Puregold ay ang "rebranding" ng aktor na magpopokus na ngayon sa paggawa ng romantic-comedy series, at iiwasan na muna ang "paghuhubad" sa Vivamax.

Ayon sa panayam ng press kay Wilbert matapos ang media conference ng naturang online series na ginanap sa World Trade Center sa Pasay City, Maynila noong Huwebes, Mayo 18, ang nakatulong at nakapagbigay-inspirasyon talaga sa kaniya upang pasukin ang comedy ay itinuturing niyang nanay-nanayan na sina "It's Showtime" hosts Unkabogable Phenomenal Star Vice Ganda at Kuys Vhong Navarro.

"Sobra po. Vice (Ganda) and all the people in Showtime, sobrang laki ng impluwensya nila, sa pagiging comedian ko ngayon, lalo na si Kuya Vhong (Navarro). Si Kuya Vhong yung nagsabi sa akin na 'Kailangan you have your own' na tatatak na ikaw lang, sariling personalidad sa showbiz, kung gusto mong mag-succeed," aniya.

Hindi naman daw niya tuluyang tatalikuran ang pagpapa-sexy pero mas magbibigay-tuon muna siya sa comedy o kaya naman sa rom-com.

"Malay natin may project na ang ganda ng story, so why not, kasi artista naman ako… for now, magpopokus na muna ako sa rom-com."

Natanong si Wilbert kung sinong komedyante ang bet niyang makasama sa proyekto. Siyempre, sino pa nga ba kundi ang kaniyang "Mama Ganda." Wala pa pala silang proyekto na magkasama, lalo na sa comedy movie.

Eh kung sakali, papayag ba siyang magtambal sila ni Vice pero siya ang magiging "love interest" nito sa kuwento?

"Kaming dalawa? Parang ang awkward naman po no'n haha. Alam naman ng mga tao na nanay-nanayan ko siya…"

"Pero kung maganda naman ang story, oo why not, pero na-awkward ako, ma-awkward kaming dalawa siguro…" giit pa niya.

Anyway, mapapanood ang "Ang Lalaki sa Likod ng Profile" sa opisyal na YouTube channel ng Puregold, sa direksyon ni Victor

Villanueva. Ang producer naman nito ay ang award-winning director na si Chris Cahilig.

Ilan pa sa cast members ay sina Kat Galang, Migs Almendras, Star Orjaliza, Moi Marcampo, TJ Valderrama, Anjo Resurreccion, at Marissa Sanchez.