Natimbog ng pulisya at militar ang isang lalaking pinaghahanap ng batas sa kasong qualified theft matapos magpanggap na opisyal ng Philippine National Police (PNP) sa Quezon City kamakailan.
Sinampahan na ng kasong paglabag sa Republic Act 10591 (Comprehensive Firearms and Ammunition Regulation Act), Article 177 ng Revised Penal Code (Usurpation of Official Functions), Article 179 (Illegal Use of Uniform or Insignia), at Article 151 (Resistance and Disobedience to a Person in Authority or the Agents of such Person) si Joel James Macapagal Victoria, 44.
Si Victoria ay dinampot ng mga tauhan Criminal Investigation and Detection Group (CIDG) at Philippine Army (PA) sa Barangay Pag-asa, Quezon City nitong Pebrero 21, dakong 11:50 ng gabi.
Lumaban pa si Victoria at nagpakilala bilang Police Major sa mga arresting team, ayon sa CIDG chief Brig. Gen. Romeo Caramat, Jr..
Wendell Ramos, pinuri matapos iurong ang kandidatura bilang konsehal
“He even presented his supposed PNP identification card,” sabi ni Caramat.
Hawak ng mga awtoridad ang warrant of arrest na inilabas ni Quezon City Regional Trial Court Branch 96 Judge Primo Sio, Jr. laban kay Victoria sa kasong qualified theft.
“The accused was reported to be engaged in various illegal activities such as large-scale estafa, qualified theft, usurpation of authority, and other fraudulent activities operating in Quezon City and nearby cities,” banggit pa ni Caramat.
Nakumpiska sa akusado ang isang Cal. 40 pistol at magazine na may 10 bala, PNP ID card na nakapangalan sa isang Police Major Joel Victoria, Armed Forces of the Philippines (AFP) ID card na nakapangalan din sa kanya, iba't ibang ID, PNP GOA A (PNP authorized uniforms) na may nameplate at insignias; at CIS-NCR QCPD t-shirt.
