Tila diretsang banat kay “Wowowin” host Willie Revillame ang makahulugang tweet ni Ogie Diaz ngayong gabi ng Linggo, Pebrero 5, kasunod ng pakiusap nitong ipagdasal na lang sa halip na matuwa pa sa kamakailang balita ng pagsasara ng ilang programa sa ALLTV.
Matatandaang malawakang pambabatikos sa Twitter ang inani ng host kasunod ng kaniyang naunang pagsita sa mga nakikisiya pa umano sa pagtatapos ng ilang programa sa bagong network ng mga Villar.
“Sana hindi ganoon. Ako naman, willing tumulong dahil sa sobrang blessed namin. You have to understand, nagsisimula pa lang po ang ALLTV. Nagsisimula pa lang kami, sanggol pa lang ito. Talagang wala pang commercial na papasok dito kasi wala pa kaming reach. Wala pa kaming signal. Sinisimulan pa lang, eh.”
Content creator, 'di kinaya ugali ng dating Sang'gre sa concert ng BINI: 'Pipi na ba kayo?'
“Ipagdasal n’yo kami. Ipagdasal n’yo kami na maging successful ito para maraming mga istasyon na maraming magawa. Marami kayong marinig na kabutihan. Set aside n’yo yung pulitika,” bahagi ng pahayag at pakiusap ng host sa kaniyang manunuod kamakailan.
Tila hindi naman nagustuhan ng talent manager na si Ogie ang naging litanayang ito ni Kuya Wil.
Una itong nagpakawala ng tweet ukol sa mga kongresista umanong bomoto para hindi mai-renew ang prangkisa ng ABS-CBN.
“Andami palang congressmen na bumoto sa no to abs-cbn franchise ang na-Lotlot & Friends nitong 2022, no? Wala na yung pinapanginoon nila, pero andiyan pa din yung abs-cbn. Patuloy na pinapanood ng mga nag-no to franchise cong,” sey ni Ogie.
Tila kontrobersyal naman ang sumunod na hirit ng showbiz personality na may isang taong pinatutungkulan.
“Wag umiyak. Kung nung araw na kailangan ang luha ng pagdamay mo ay hindi rin naman naramdaman. Bagkus nakitawa ka pa. Kaya wag mamalimos ng simpatya. Kaya mo yan. Wala kang di kinaya,” ani Ogie.
Para sa ilang netizens na mababasa sa kanilang reply sa talent manager, ang Wowowin host daw ang target ng nasabing tweet.
Sunod niyang sey: “Wala ba from the congress ang tatayo para makiusap sa all tv na wag munang magpahinga dahil kawawa naman ang mga taong mawawalan ng trabaho?”
Ito’y kasunod pa rin sa isyu kaugnay ng nalalapit nang pagkawala sa ere ng ilang programa sa network, bagay na sa pag-uulat ay hindi pa rin kinumpirma ng AMBS-ALLTV.
Samantala, inaabangan ngayon kung bubuwelta nga ba si Kuya Wil kasunod ng trending na pambabatikos sa nauna niyang pahayag.
