San Fabian, Pangasinan -- Pinagsasaksak hanggang sa mamatay ang isang 17-anyos na estudyante sa kahabaan ng national highway ng Brgy. Tocok nitong Linggo ng gabi, Oktubre 16.
Kinilala ng Pangasinan Police ang biktima na si Jonathan Carig, residente ng Brgy. Mabilao habang ang suspek ay kinilalang si Mark Ymasa, 25, ng Brgy. Tocok.
Batay sa imbestigasyon, dumating sa nasabing lugar ang biktima at ang kaniyang kaibigan na Mark din ang pangalan upang makilala ang isang babaeng nililigawan ng huli na may ngalan na Hannah.
Mag-isang nakaupo si Jonathan sa motorsiklo ilang metro ang layo sa kaniyang kaibigan nang lapitan siya ni Ymasa saka tinutukan ng kutsilyo ang kanang bahagi ng baywang niya.
Lolang bibisita sa City Jail, timbog matapos mahulihan ng ilegal na droga
Pagkatapos ay naglakad ang dalawa patungo sa madilim na bahagi ng kalsada at kalauna'y nakita ang biktima na tumatakbo at sumisigaw ng saklolo nang pagsasaksakin umano ng suspek.
Bumagsak ang biktima habang tumakas naman ang suspek.
Isinugod ang biktima sa R1MC Hospital sa Dagupan City, ngunit idineklara itong dead on arrival ng kaniyang attending physician.
Samantala, naaresto ang suspek matapos ang hot pursuit operation.Kasalukuyang nasa kustodiya na ng mga pulis ang suspek maging ang ginamit na kutsilyo sa pagpatay.
