Ganoon na lamang ang iyak ng kasambahay ng social media personality na si Whamos Cruz nang pagalitan niya ito matapos na tumangging sumabay sa kanila sa hapag-kainan at isisi sa kaniya ang nasira umanong screen door.
Lingid sa kaniyang kaalaman, isang "prank" lamang ito ng kaniyang amo dahil plano umano siyang bigyan nito ng bagong cellphone, dahil sa kaniyang kasipagan at dedikasyon sa trabaho.
"Lahat ng inuutos namin ang bilis niya gawin, medyo natataranta lang siya," patotoo ni Whamos.
Sa video na nakuhanan ng nakakubling camera, makikitang inalok ni Whamos ang kasambahay na sumalo sa kanilang kumain ng partner niyang si Antonette Gail subalit tumanggi ito.
Content creator, 'di kinaya ugali ng dating Sang'gre sa concert ng BINI: 'Pipi na ba kayo?'
Kunwari naman ay nagalit si Whamos at sinabing hindi na siya kakain kung hindi kasabay ang kasambahay.
"Bakit ba ayaw mo kaming kasabay kumain? Ilang araw ko nang napapansin 'yan," ani Whamos.
Upang mas maging kapani-paniwala ang prank, kunwari ay nanermon na si Whamos sa lahat.
"Minsan lang akong magsalita sa inyong lahat… kapag sinabi ko, susundin ninyo…" aniya.
Bukod dito, sinisi pa ni Whamos ang kasambahay sa pagkasira umano ng screen door. Habang sumusubo ng pagkain ang kasambahay ay tuluyan na itong napaiyak.
Ngunit ang iyak na nagmula sa pagkapahiya ay napalitan ng "tears of joy" matapos ang grand reveal ni Whamos at iba pang mga kasabwat, na isang prank lamang ang lahat. Iniabot niya sa kasambahay ang kahong naglalaman ng bagong cellphone.
Bumaha naman ng positibong reaksiyon at komento sa comment section ng naturang FB post.
