Nagbalik-tanaw ang Kapamilya singer na si Angeline Quinto sa hindi naging madaling pagsisimula ng relasyon nila ng kanyang partner na si Nonrev Daquina.
Pag-amin ni Angeline, hindi sang-ayon sa pakikipagrelasyon niya kay Nonrev ang kaniyang manager.
“Noong una, ayaw ng manager ko sa kaniya. Ako, ang priority ko talaga trabaho. Doon ako nahirapan na sino ba ang uunahin ko,” sey ni Angge sa parehong kwela at seryosong panayam ng kaibigang si Luis Manzano kamakailan.
Ipinagtapat naman ng singer sa non-showbiz partner ang disinteres ng kaniyang manager, bagay na hindi rin naman naging dahilan para tigilan nitong panindigan si Angeline.
Jude Bacalso, nanindigang valid complaint pagtawag ng 'Sir' sa kaniya ng waiter
“Tinuloy ko pa rin. Pinakita ko na gusto ko talaga siya; na mahal ko siya,” tipid na sabi ni Nonrev.
Aminado si Angeline na hindi naging madali para sa kaniya ang sitwasyon nila noon.
“Nahihirapan ‘din ako so ayoko na itago lang sa akin ‘yun. Parang karapatan ni Non na malaman ‘yun since kaming dalawa ang magkarelasyon so sabi sa kanya, ‘Hindi ko alam kung paano yung gagawin ko ngayon.’”
Maging ang Kapamilya singer ay muntik na rin sumuko noon ngunit sa huli, parehong nagpasya ang dalawa na ituloy ang kanilang tinutulang relasyon.
“Tinuloy pa rin namin. Ang dami kong pinaliwanag sa manager ko. Pinakita din naman talaga naming na mahal naming ang isa’t isa. Nung dumating si Sylvio, sobra siyang naging love na rin ng manager ko,” paglalahad ni Angeline sa happy ending pa rin na pagmamahalan nila ni Nonrev.
