ATIMONAN, QUEZON -- Vinideohan umano ng isang 19-anyos na laborer ang kaniyang sarili habang nagpapakamatay noong Linggo ng hapon, Hulyo 17.

Kinilala ng officer on case na si Police Senior Master Sergeant Oliver Andrey, ng Atimonan Municipal Police Station, ang biktima na si Dominic Lagajan, binata, at residente ng Barangay Sta. Catalina, Atimonan, Quezon. 

Ang bangkay ng biktima ay natuklasan umano ng kanyang inang si Marissa, alas-5 ng hapon sa construction barracks sa nasabing lugar nang bisitahin niya ang una, kasunod ng natanggap na ulat mula sa Atimonan police station.

Isang rappelling rope na nakapulupot sa leeg na nakatali sa bubongan ang nakita ni Marissa at agad niyang ibinaba ang nakabitin anak.

Ang biktima ay dinala sa Doña Marta Memorial District Hospital ng mga rumespondeng pulis, ngunit idineklara na itong patay ng attending physician.

Natagpuan ng ina ng biktima ang cellular phone ng anak, na nagpapakita na naka-video ang biktima gamit ang kanyang Snapchat account sa pagkitil sa sarili.

Ang cellular phone at pati na rin ang rappelling rope ay hawak ng Atimonan Police homicide section. Ang insidente ay itinuring na case closed, ayon sa ulat.