Matapos kumambyo ang ama ni Carla Abellana na si Rey “PJ” Abellana sa unang pahayag nito kaugnay ng umano’y kinasangkutang “one-night stand” ng manugang na si Tom Rodriguez, may gigil na payo ang showbiz commentator na si Cristy Fermin sa kontrobersyal na Kapuso couple.
Sa panayam ng “Chika Minute” kamakailan, binawi ni PJ ang unang mabibigat na salaysay nito sa programa ni Cristy. Aniya, wala raw nangyaring one night stand, at sa halip ay sinabi sa kanya ni Tom ang hangarin nitong ayusin ang hidwaan nilang mag-asawa.
“At first may nakarating po at nalaman ni Carla na may issue na one night stand na involve si Tom. Si Tom naman ah…was already able to explain kay Carla na wala naman din pong katotohanan ito at naiwasan naman din niya na mangyari iyon. So wala pong natuloy na one night stand according to Tom side naman. So yun po yung senaryo ng issue ng one night stand,” pagbawi ni PJ.
Tila nanggigil naman si Cristy Fermin matapos baliktaran ng aktor ang mga pahayag nito.
98% ng buhok, nalagas na; Doc Willie may mensahe sa kabataan, mga magulang
“Eh kung ganoon naman pala ang nangyayari, ano pa ba ang kailangan nating pagtalunan? Mag-usap na kasi kayong dalawa. Yun lang naman yun. Ay naku,” tila gigil na payo ni Cristy sa Kapuso couple.
“Bakit ba ayaw nilang magpahayag kung ano ang gusto nilang sabihin? Para hindi na lang kung ano-ano ang lumabas. ‘Yan tignan mo, pati karakter niya ngayon napupuna na, imbis na problema lang. Ito na, dugtong-dugtong na talaga,” paggatong pa ng partner ni Cristy na si Rommel.
Naungkat din kasi kamakailan ang lumang isyu kaugnay ng umano’y pagiging maldita ni Carla matapos mapabalitang na-imbyerna ang aktres sa ama kasunod ng “one night stand” issue.
“Kailan kayo magsasalita? Kapag punong-puno na ang husga sa inyo ang bayan? Buti nga nandiyan si Rey Abellana [at] kahit papano nagbigay ng impormasyon, ‘di ba,” dagdag na hirit ni Cristy.
Hindi rin benta kina Cristy at Rommel ang dahilan ni Carla sa patuloy nitong pagiging tikom sa isyu. Ani Rommel, ang dalawa ang unang nagbigay ng ilang makahulugang posts dahilan para sumabog ang isyu at pagpiyestahan ng mga Marites.
“Bakit siya nagpo-post ng mga cryptic post?” tanong ni Rommel.
“Totoo ‘yan. Parang ikaw ang nagbibigay ng alarma,” segunda ni Cristy.
Sa huli, muling binigyang-diin ni Cristy na dapat nang magsalita ang mag-asawa para iwasan pang magsilang ng dagdag na mga isyu ang kanilang hidwaan.
