Muli na namang lumikha ng ingay at intriga ang kontrobersyal na singer-character actress-vlogger na si Mystica matapos niyang ibuking sa kaniyang vlogs ang tunay na estado sa relasyon ng yumaong komedyanteng si Noemi Tesorero o mas kilala bilang 'Mahal' at ang guwapo nitong espesyal na kaibigan na si Mygz Molino.
Matatandaang kinakikiligan ng mga fans at subscribers ng kanilang vlogs ang kanilang 'loveteam' kaya iniintriga silang may lihim na relasyon. Noong nabubuhay pa si Mahal, ilang beses niyang itinanggi na boyfriend niya si Mygz; sadyang malalim lamang umano ang kanilang pagkakaibigan. Ganoon na lamang ang paghihinagpis ni Mygz nang sumakabilang-buhay si Mahal noong Agosto 31, 2021.
Sa pasabog ni Mystica, sinabi niyang may malalim silang pinagsamahan ni Mahal, subalit pinili na lamang niyang manahimik a kasagsagan ng pagkamatay nito, upang hindi maparatangan na ginagamit ang nangyari sa komedyante upang sumikat siya.
Content creator, 'di kinaya ugali ng dating Sang'gre sa concert ng BINI: 'Pipi na ba kayo?'
Sinabihan din niya ang mga tagahanga ng MaMygz na wala talagang relasyon sina Mahal at Mygz, dahil ang tunay umanong karelasyon ni Mygz ay ang ex-boyfriend niyang si Jethro Carandang, na talent manager naman ni Mahal. Pahayag ni Mystica, naghiwalay umano sila ni Jethro dahil sa pang-aagaw ni Mygz mula sa kaniya.
Bumanat naman ang mga tagasuporta ng MaMygz tandem kay Mystica. Nakikisawsaw lamang umano ang sexy singer sa kasikatan nina Mahal at Mygz Molino. Nais lamang daw nitong magpapansin at magpasikat. Mariin naman itong itinanggi ni Mystica at sinabi niyang katotohanan lamang umano ang kaniyang sinasabi.
Naglabas din ng vlog ang kapatid na lalaki ni Mahal na si Jason Tesorero upang dipensahan ang kanilang pamilya sa umano'y batikos na natatanggap mula sa mga netizens, na pinabayaan umano nila si Mahal.
Nagkasama sina Mystica, Mahal, at Mygz Molino sa teleseryeng 'Owe My Love' sa GMA Network.
Samantala, wala pang opisyal na pahayag si Mygz Molino o si Jethro Carandang sa mga akusasyong ibinabato sa kanila ni Mystica.
