ni MARIVIC AWITAN
Pumayag ang mga opisyal ng lalawigan ng Batangas upang maging host ng mga practice sessions ng mga koponan ng Philippine Basketball Association (PBA) para sa kanilang paghahanda sa planong pagbubukas ng 46th season ng liga sa susunod na buwan.
Pagkaraan ng ilang serye ng pag-uusap sa pagitan nina PBA commissioner Willie Marcial, Batangas City Mayor Beverley Dimacuha at Representative Marvin Mariño, napagkasunduan na simulan sa kalagitnaan ng buwan.
“Okay na ang LGU. JAO (Joint Administrative Order from the Department of Health and Games and Amusements Board and Philippine Sports Commission and maybe we can start practices by the middle of May,” wika ni Marcial.
Goodbye PBA? John Amores, tinanggalan na ng professional license!
Hindi gaya ng Metro Manila at mga kalapit lalawigan na Cavite, Laguna at Rizal na nasa ilalim ng modified enhanced community quarantine (MECQ), ang Batangas ay kasalukuyang nasa ilalim ng mas maluwag na general community quarantine (GCQ).
Ayon pa kay Marcial, hanggang pitong team ang may planong magdaos ng training camp sa Batangas na may dalawang training centers sa Batangas City Coliseum at Batangas State University Gym.
Gayunman, hindi binanggit kung habang nasa training ay sa Batangas na din muna mananatili ang mga team.
Dahil wala pang linaw ang lahat, may mga hindi sumang-ayon sa balak na pagsasanay sa Batangas dahil sa layo nito sa Metro Manila.
Kabilang na rito si Meralco head coach Norman Black na nagsabing susubukan nilang maghanap ng ibang lugar.
“Batangas is quite away from Metro Manila. I’m not sure if we’re going to take advantage of that,” ani Black. “A lot of my guys live in Quezon City, so that’s quite a waste to travel everyday to Batangas.”
“First, we have to figure out where we could train. Until we can figure out the logistics and all, we just have to wait on what exactly is going to happen going forward,” dagdag nito.
