ANG island province, na tanyag sa beaches at kabundukan nito, ay naglunsad ng bagong atraksiyon para sa mahihilig sa outdoor activity at sa mountain trekkers.
Inilunsad ng pamahalaang panlalawigan ng Mambajao, Camiguin, Department of Tourism (DoT)-Region 10, at Department of Environment and Natural Resources (DENR)-Region 10 kamakailan ang “Climb Camiguin” campaign, na layuning ipakita ang ilang bulkan sa lalawigan – partikular ang Mt. Hibok- Hibok—na destinasyon para sa mga nais ng adventure.
Ayon kay Camiguin Gov. Maria Luisa Romualdo, layunin ng “Climb Camiguin” na i-promote ang lalawigan bilang pangunahing destinasyon para sa mountain tourism sa bansa.
“The province recognizes the potential of volcano tourism for driving the socioeconomic growth and development of the local community,” ani Romualdo sa paglulunsad.
Marupok ang demokrasya—ngunit nasa mamamayan ang tunay na lakas nito
Ang Mt. Hibok-Hibok at ang kanugnog nitong Mt. Timpoong ay idineklara kamakailan ng Association of Southeast Asian Nations (ASEAN) Center for Biodiversity bilang ASEAN heritage park.
Opisyal na kilala bilang Mt. Timpoong- Mt. Hibok-Hibok Natural Monument, ang dalawang bulkan ay kabilang na sa ilang protected areas sa bansa.
Ang bundok o bulkan ay tahanan din ng endemic species ng flora at fauna na matatagpuan sa bahaging ito ng Mindanao.
Ilan sa mga katulad na lugar nito sa Pilipinas ang Mt. Apo Natural Park, Mt. Kitanglad Range Natural Park, Mt. Malindang Range Natural Park, Mt. Hamiguitan Range Wildlife Sanctuary, Mts. Iglit-Baco National Park, Mt. Makiling Forest Reserve, at ang Tubbataha Reefs Natural Park.
Inihayag ni DoT-10 Director Marie Elaine Unchuan na ang protected areas ng rehiyon—ang Mt. Kitanglad Range Natural Park, Mt. Malindang Range Natural Park, at Mt. Timpoong-Mt. Hibok- Hibok Natural Monument – ay inspirasyon ng ahensiya para maglunsad ng mountain tourism sa Northern Mindanao.
Ayon kay Unchuan, ang mountain tourism ang pinakabagong karagdagan sa mga produktong ipinakilala ng DoT-10, bukod sa farm tourism, dive tourism, faith tourism, at cultural tourism.
Aniya, isa sa mga suliranin ng tourism department bago ang paglulunsad ng proyekto ay ang paglikha ng batas o ordinansa ng mga lokal na pamahalaan para maprotektahan ang mga bundok sa kani-kanilang lugar.
“Legislations should be in place, and communities must be involved in this,” sabi pa niya.
Giit naman ni Gideon Lasco, ng Philippine Mountaineering Today, hindi lamang dapat ito magtuon sa pagpapahusay sa buhay ng mamamayan, ngunit sa pagpapanatili rin ng mga natural resources ng mga tourism area gaya ng Camiguin.
“The need to protect the mountains is a very valid motivation to take care of the environment. But we who climb mountains, and all our friends, have the opportunity to promote a different kind of motivation to protect the mountains, and that is because we love them,” sabi ni Lasco.
Nanawagan naman si Mambajao Mayor Jurdin Jesus Romualdo sa mga mountain climbers para tumulong sa pagpapakalat ng balita tungkol sa mga bulubundukin ng Camiguin.
“Wherever you go, please speak about Camiguin and be our spokespersons to promote Camiguin and help us in our conservation of this beautiful province,” sabi pa ni Romualdo.
PNA
