Lalong tumindi ang tensyon sa Middle East matapos tamaan ng mga airstrike ang dalawang tulay at isang estasyon ng tren sa Iran, kasabay ng panibagong banta mula kay US President Donald Trump hinggil sa posibleng malawakang pag-atake.
Ayon sa ulat ng The Associated Press, hinikayat ng mga opisyal ng Iran ang kabataan na bumuo ng “human chains” upang protektahan ang mahahalagang pasilidad tulad ng mga planta ng kuryente.
Ito ay kasunod ng babala ni Trump na maaaring “mamatay ang isang buong sibilisasyon ngayong gabi” kung hindi tutugon ang Iran sa itinakdang deadline para sa isang kasunduan, kabilang ang muling pagbubukas ng Strait of Hormuz, na pangunahing chokepoint sa kalakalan ng langis.
Maki-Balita: ALAMIN: Bakit mahalaga ang ‘Strait of Hormuz’ sa bentahan ng langis ng mga bansa?
Ipinahiwatig din ni Trump na maaaring sirain ng US ang mga tulay at power plants sa Iran kung hindi agad maaayos ang sitwasyon. Ang nasabing kipot ay dinaraanan ng humigit-kumulang isang-limang bahagi ng pandaigdigang suplay ng langis, kaya’t anumang sagabal dito ay may malaking epekto sa ekonomiya ng mundo.
WHO, nababahala sa ‘scale and speed’ ng Ebola outbreak; 134 suspected deaths naitala
Samantala, sinabi ni Iranian President Masoud Pezeshkian na umabot na sa 14 milyong Iranian ang nagboluntaryong lumaban, habang nanawagan ang Revolutionary Guard sa mga sibilyan na makibahagi sa pagbabantay sa mga checkpoint. Nagbanta rin ang naturang grupo na puputulin ang suplay ng langis at gas sa rehiyon kung itutuloy ng US ang pag-atake.
Hindi pa malinaw kung direktang konektado ang mga pinakahuling airstrike sa banta ni Trump, ngunit ilan sa mga tinamaan ay bahagi ng rail network ng Iran na nauna nang binanggit ng Israel bilang posibleng target. Patuloy ring nagsasagawa ng mga pag-atake ang Israel na layong pahinain ang ekonomiya ng Iran.
Sa kabila ng umiinit na sitwasyon, nagpapatuloy pa rin ang diplomatikong usapan. Gayunpaman, tinanggihan ng Iran ang pinakahuling panukala ng Estados Unidos, at nananatiling hindi tiyak kung magkakaroon ng kasunduan bago ang itinakdang deadline.
Nagbabala ang ilang lider ng mundo at eksperto na ang malawakang pag-atake na binabanggit ni Trump ay maaaring ituring na paglabag sa internasyonal na batas at posibleng war crime.
Sa Tehran, ramdam ang pangamba ng mga mamamayan. Ayon sa isang guro, nangangamba siya na ang patuloy na paglala ng sigalot ay magdudulot ng malawakang kaguluhan. Aniya, kung mawawala ang mga pangunahing serbisyo tulad ng kuryente, tubig, at internet, tila babalik ang bansa sa sinaunang panahon.
Habang papalapit ang deadline, patuloy na nakatutok ang buong mundo sa posibleng kahihinatnan ng krisis na ito, na maaaring magkaroon ng malawakang epekto hindi lamang sa rehiyon kundi sa buong pandaigdigang komunidad.
