Ni Bella Gamotea
Patung-patong na kaso ang kinakaharap ng isang lalaki makaraang bumunot ng baril at pagbantaan ang isang water technician sa Muntinlupa City, nitong Biyernes.
Nakapiit sa Muntinlupa City Police si Eduardo Arciaga, alyas Eddie, 58, ng No. 215 Arciaga Compound, Barangay Putatan ng nasabing lungsod.
Kinilala naman ang biktima na si Jonnel Constantino y Brigino, 31, water technician ng Maynilad.
Archdiocese of Manila, hindi mag-eendorso ng kandidato sa eleksyon
Sa ulat ni Southern Police District (SPD) spokesperson, Supt. Jenny Tecson, naganap ang insidente sa Arciaga Compound, sa Bgy. Putatan, bandang 12:30 ng tanghali.
Personal na ini-report ni Constantino sa Police Community Precinct (PCP) 2 Soldier Hills Village ang insidente at humingi ng ayuda.
Ayon kay Constantino, pinagbantaan siya ni Arciaga, gamit ang isang baril, sa hindi batid na dahilan.
Mabilis na rumesponde ang mga pulis, sa pangunguna ni PO1 Warlito Nisperos, at naaresto si Arciaga at narekober ang isang Armscor caliber .45 pistol, isang magazine, at tatlong bala.
Sasampahan si Arciaga ng kasong grave threat, paglabag sa Comprehensive Firearms and Ammunition Act (RA10591), at Omnibus Election Code.
