STA. ROSA, Nueva Ecija - Tatlong lalaking stay-in helper sa isang ricemill ang nasakote ng pinagsanib na puwersa ng Dangerous Enforcement Unit (DEU) ng pulisya at Philippine Drug Enforcement Agency (PDEA)-Region 3 matapos maaktuhan sa pot session sa tabi ng kanilang barracks sa Barangay Lourdes sa Sta. Rosa, Nueva Ecija, nitong Linggo ng hapon.
Ayon sa ulat ng Sta. Rosa Police, dakong 1:55 ng hapon nang ikasa ang anti-illegal drugs operation sa ricemill ni Benedicto dela Cruz, at naaresto sina Jimmy Magellan y Laseb, 47, tubong Matanao, Davao Del Sur; Jun-Jun Arsenal y Barrico, 34, tubong Leyte; at Junry Daguyo y Anselmo, 33, tubong Valencia City, Bukidnon, na pawang helper sa ricemill.
Nasamsam mula sa mga suspek ang dalawang plastic sachet ng hinihinalang shabu at drug paraphernalia.
(Light A. Nolasco)
