DAVAO CITY – Bagamat pormal nang nailuklok sa Malacañang nitong Huwebes, sinabi ni Presidential Communications Office Secretary Martin Andanar na nais pa rin, dahil mas komportable si President Rodrigo “Digong” Duterte, na tawagin siyang “Mayor” sa halip na “Presidente” o “Pangulo.”
O kaya, ayon pa kay Andanar, maaari ring tawagin si Duterte sa pamamagitan ng kanyang inisyal sa pangalan, tulad ng PRRD para sa President Rodrigo Roa Duterte o “Mayor RRD.”
Ilang beses na ring sinabi ni Duterte na mas gugustuhin niyang tawagin siya ng mga Pinoy bilang “Mayor ng Pilipinas.”
Bago nahalal bilang Pangulo ng bansa nitong Mayo 9, 22 taong nagsilbi si Digong bilang alkade ng Davao City, na roon siya nagpatupad ng “kamay na bakal” laban sa kriminalidad upang madisiplina ang mga residente.
#WalangPasok: Class suspensions ngayong Biyernes, Sept. 20
Sa panayam, sinabi ng anak ni Digong na si Davao City Mayor Paolo Z. Duterte na walang ipinagbago ang aura ng kanyang ama simula nang manumpa ito sa tungkulin sa Malacañang nitong Huwebes.
“Parang tingin namin, Mayor pa rin siya,” giit ni Paolo.
Matatandaan na ang mga dating Pangulo ng bansa na sina Fidel Valdez Ramos at Gloria Macapagal Arroyo ay pabor na tawagin sila sa kanilang mga inisyal na pangalang FVR at GMA.
Habang sina dating Pangulong Joseph Estrada at Benigno Simeon Aquino III ay may palayaw na “Erap” at “PNoy” sa mamamayan.
Binansagan naman ng mga Davaoeño si Pangulong Duterte bilang “Digong”, “Rody”, o “CM” bilang City Mayor.
Mayroon ding mga tagasuporta na ang tawag kay Pangulong Duterte ay “PaDi” para sa Pangulong Digong. (YAS D. OCAMPO)
