MAGING hadlang kaya ang buhul-buhol na nakaraan upang magkatuluyan ang dalawang taong itinadhana para sa isa’t isa?

Madaragdagan ang kilig ng mga manonood gabi-gabi sa nalalapit na pag-uumpisa ng Born For You, ang pinakabagong teleseryeng handog ng ABS-CBN at Dreamscape Television Entertainment, na pinagbibidahan ng bagong tambalan nina Janella Salvador at Elmo Magalona.

Gaganap si Janella bilang si Sam Kazuko, aspiring Pinay singer na lumaki sa Japan. Dahil sa pagiging hopeless romantic, naniniwala siya sa konsepto ng red string of fate na nagsasabing isang invisible string ang nag-uugnay sa dalawang taong itinadhana para sa isa’t isa.

ALAMIN: Ano nga ba ang EBET Law na pinirmahan ni PBBM

Gagampanan naman si Elmo ang character ni Kevin Sebastian, sikat na singer at anak ng OPM icon na nagpasikat ng kantang Born for You na si Mike Sebastian (Ariel Rivera). Bagamat nasa rurok ng kasikatan, may hinaing si Kevin tungkol sa love at destiny dahil sa kumplikadong relasyon ng kanyang mga magulang.

Ang hilig nina Sam at Kevin sa musika ang maglalapit sa kanilang dalawa, ngunit ito rin ang posibleng makasira sa kanilang umuusbong na pag-iibigan.

Isinulat ng ama ni Sam na si Buddy (Bernard Palanca) ang kantang Born for You para sa kanyang ina na si Cathy (Vina Morales). Pero inangkin ito ni Marge (Ayen Laurel), anak ng may-ari ng isang sikat na record label, at ibinigay ang kanta kay Mike sa kagustuhang pasikatin at ibigin siya ng male singer.

Nagtagumpay si Marge sa kanyang mga plano nang mapasikat at mapaibig si Mike. Nagbunga rin ang kanilang pagmamahalan nang isilang si Kevin. Ngunit sabay sa kanilang kasiyahan ay ang lubos na paghihirap ng pamilya ni Buddy na hindi inaasahan ang pagkamatay, ang nagtulak kay Cathy para magtumungo sa Japan upang kumita ng pera para kay Sam.

Anong tadhana kaya ang naghihintay para kina Sam at Kevin? Paano makaaapekto sa kanilang kapalaran ang mga pangyayari sa nakaraan? Maputol kaya ang invisible string na nag-uugnay sa kanila?

Kasama rin sa cast ng Born for You sina Gina Pareño, Freddie Webb, Jimboy Martin, Joj Agpangan, Francis Magundayao, Smokey Manaloto, Ogie Diaz, Katya Santos, DJ Durano, Alfred Labatos, Kyline Alcantara, Paulo O’Hara, Neil Coleta, at Young JV. Ito ay mula sa direksyon ni Onat Diaz.