SAN JOSE CITY, Nueva Ecija - Pinaghahanap ngayon ng pulisya ang isang 36-anyos na driver/salesman ng Alemart Corporation makaraang tangayin nito ang pinagbentahan ng mga produkto ng kumpanya at abandonahin ang minanehong Isuzu truck sa barangay road sa Zone 16-A, Sitio Tanibong, Barangay Abar ng lungsod na ito.
Inireklamo ni Lord Jacob Aclan y Gamboa, 42, sales supervisor, sa pulisya ang pagtangay ng daily sales ng kumpanya na hindi ini-remit sa opisina.
Ayon kay Melvin Ancheta y Licay, helper ni Edwin Beley y Aeta, sales agent at driver, ng Bgy. Maliolio, Sta. Rosa, itinakas ng huli ang koleksiyon, inabandona ang truck (XTZ-634), at iniwan siya.
Sa imbestigasyon ni SPO1 Joel Beltejar, dakong 4:45 ng hapon nitong Mayo 26 nang tangkasin ng suspek ang lahat ng kinita para sa araw na ‘yun, umaabot sa P70,000, at hindi na nagpakita pa sa opisina. (Light A. Nolasco)
