IPINAGDIWANG ng GMA Artist Center ang Pasko sa pamamagitan ng isang Christmas Fans Day na ginanap noong December 23 sa Studio 7 ng GMA Network Annex.
Pinangunahan ni German “Kuya Germs” Moreno ang programa at nagpahayag ng munting pasasalamat sa audience na naging mainit ang pagtanggap sa kanya. Nangako ang Master Showman na hindi siya titigil sa pagsuporta sa entertainment industry.
“Maraming salamat sa inyo na walang tigil ang suporta sa mga iniidolo. Salamat sa GMA dahil walang sawa silang gumagabay sa mga batikan, at maging sa mga baguhang artista. Maligayang Pasko sa ating lahat.”
Carlos Yulo, wala pa raw naibibigay na tulong sa pamilya kahit palihim na abot?
Samantala, pinasigla ng Top One Project (TOP) ang gabi sa pagtanghal nila ng sikat na pop songs at pagharana sa fans gamit ang kanilang single na Paggising. Pinainit naman ni Julian Trono ang dance floor nang siya na ang humataw sa stage. Hindi naman nagpahuli ang Bet ng Bayan finalists na sina Hannah Precillas, Kai Atienza, Katherine Castillo, at Ralf King sa pagpapakitang-gilas sa pagbirit.
Bumati at nagpasalamat naman ang mga pinakabatang miyembro naman ng GMA Artist Center sa pangunguna ni Barbara Miguel. Nagkaroon din ng pagkakataon ang Starstruck VI Ultimate Survivors na sina Migo Adecer at Klea Pineda na magpasalamat sa kanilang mga tagasuporta sa pamamagitan ng isang awitin.
Tila naman niligawan nina James Wright at Rocco Nacino ang fans dahil sa kanilang matamis na pag-alay sa kanila ng awitin. Ganito rin pinakilig ng 3logy ang kanilang fans na nabigyan ng pagkakataong magkaroon ng selfie kasama nila sa stage.
Ikinatuwa ng fans ang pagkakaroon ng raffle, dahil bukod sa nanalo sila ng iba’t ibang regalo ay nakahalubilo pa nila ang kanilang mga iniidolo. At habang lumalalim ang gabi ay lalo namang ginanahan ang audience dahil nagpakilig ang Kapuso love team na sina Gabbi Garcia at Ruru Madrid sa isang kanta.
Hindi natapos ang gabi hangga’t hindi nagpapakita ang Pambansang Bae na si Alden Richards. Niyanig ang Studio 7 ng matitinding hiyawan at tilian nang ipakita sa screen ang video greeting ni Alden. Hindi napahintulutan ng kanyang mahigpit na schedule ang kanyang pagdalo sa mismong Fans Day pero hindi iyon naging hadlang para maihayag niya ang kanyang pasasalamat sa fans.
Naging matagumpay ang GMA Artist Center Christmas Fans Day dahil sa pagmamahalang ipinamalas ng Kapuso artists at ng fans sa bawat isa.
