Isinailalim kahapon ng Philippine Atmospheric Geophysical and Astronomical Services Administration (PAGASA) sa Public Storm Warning Signal (PSWS) No. 1 ang 23 lalawigan sa Mindanao dahil sa inaasahang pagtama ng bagyong ‘Onyok’ sa Surigao del Sur at Davao Oriental.
Kabilang sa mga lugar na nasa Signal No. 1 ang Surigao Del Sur (kabilang ang Siargao Island), Surigao Del Norte, Dinagat Province, Misamis Oriental, Camiguin, Agusan Del Norte, Agusan Del Sur, Davao Oriental, Davao Del Norte, Compostela Valley, Bukidnon, Lanao Del Norte, Lanao Del Sur, Misamis Occidental, Davao Del Sur, hilagang bahagi ng Davao Occidental, Sultan Kudarat, Maguindanao, North Cotabato, hilagang bahagi ng South Cotabato, Zamboanga Del Norte, Zamboanga Del Sur at Zamboanga Sibugay.
Tinatayang ang pag-ulan ay nasa “heavy” hanggang “intense” at pinayuhan ni PAGASA forecaster Aldczar Aurelio ang mga residente sa mabababang lugar at tabi ng bundok na maging alerto sa posibleng pagbaha at pagguho ng lupa dahil nasa 150 kilometro ang lawak ng sakop ng bagyong Onyok.
Samantala, makararanas ng bahagya hanggang matinding pag-ulan ang Bicol Region, Eastern Visayas, at mga lalawigan ng Isabela, Aurora at Quezon, na posibleng magdulot ng baha at pagguho ng lupa. (Chito Chavez)
