Pormal nang pinirmahan ni Pangulong Ferdinand “Bongbong” Marcos, Jr., ang General Appropriations Act (GAA) para sa Fiscal Year (FY) 2026 sa ginanap na seremonya sa Malacañang nitong Lunes, Enero 5, 2026.
Dahil dito, opisyal nang naisabatas ang Republic Act (R.A.) No. 12314 kaugnay sa ₱6.793 trilyong national budget ng bansa para sa taong 2026.
Ayon pa sa naging talumpati ng Pangulo, tinanggal daw niya ang ilang “item” sa Unprogrammed Appropriations (UAs) na aabot sa ₱92.5 billion sa 2026 National Budget.
“To ensure that public funds are expended in clear service of national interests, I vetoed several items of appropriations with their purposes and corresponding Special Provisions under the UA, totaling almost PhP92.5 billion,” aniya.
ALAMIN: Mga dapat gawin sa pag-aalaga ng 'birdie' mo
Ngunit ano-ano nga ba ang mga item mula sa UAs ang tinanggal ni PBBM?
Ayon sa isinagawang press briefing ng Presidential Communications Office (PCO) kasama sina Executive Secretary Ralph Recto at iba pa nito ring Lunes, Enero 5, inisa-isa ni Recto ang mga item na tinanggal ni PBBM sa UAs ng national budget.
“There are roughly ten items in the unprogrammed funds,” pagsisimula niya.
Ani Recto, tinanggal ng Pangulo ang unprogrammed funds sa Government-Owned or Controlled Corporations (GOCCs).
“Ang tinanggal [ni PBBM] ‘yong budgetary support to GOCCs. Ang halaga niyan, roughly ₱6.895 billion,” aniya.
Mula sa pagbabahagi ni Recto, tinanggal din umano ng Pangulo ang Unprogrammed Funds sa mga sumusunod:
Fiscal support sa Comprehensive Automotive Resurgence Strategy (CARS) program na ₱4.320 billion;
Insurance for government assets na ₱2 billion;
Prior years Local Government Unit (LGU) shares na ₱14 million;
RACE program ₱250 thousand;
GOP counterpart sa Foreign Assisted Projects (FAPs) na ₱35.761 million; at
Payment of PS requirements na ₱43.245 million na nakapaloob na sa iba’t ibang ahensya ng pamahalaan
Pagpapatuloy pa ng secretary, natanggal din daw ang ₱80 billion mula sa Strengthening Assistance for Government Infrastructure and Social Programs (SAGIP), ₱210 million mula sa Nanpeidai Property, ₱6.7 billion sa public emergency benefits, at ₱2 billion mula sa Marawi Siege victims compensation sa ilalim ng National Expenditure Program (NEP).
“‘Yong SAGIP. Wala na ‘yong ₱80 billion na SAGIP, wala na rin ‘yong Nanpeidai Property na ₱210 million, public health emergency benefits na ₱6.7 billion, Marawi Siege victims compensation under the NEP was ₱2 billion,” pag-iisa-isa pa niya.
Nilinaw rin niyang tatlong item na lang mula sa Unprogrammed Appropriations (UAs) ang natitira at hindi na-veto ng Pangulo.
“Tatlong item na lang ang natira: Support to foreign assisted projects 97.305 billion, Revised AFP Modernization Program na 50 billion, Risk Management Program na 3.6 billion,” ‘ika niya.
Katumbas umano ng bagong Unprogrammed Funds ng 2026 National Budget ang baba halos ng Unprogrammed Funds noong 2019.
“Ito ‘yong natira sa unprogrammed funds, roughly 150.905 million na more or less [ay] katumbas no’ng unprogrammed funds noong 2019,” pagtatapos pa niya.
Mc Vincent Mirabuna/Balita
