Nilinaw ni Acting Philippine National Police (PNP) Chief Jose Melencio Nartatez, Jr., na nananatili pa ring person of interest (POI) ang driver ni dating Department of Public Works and Highways (DPWH) Undersecretary Catalina Cabral sa pagkamatay ng kaniyang amo.
Sa panayam ng media kay Nartatez nitong Lunes, Disyembre 22, 2025, iginiit niyang POI pa rin ang driver ng yumaong si Cabral dahil subjected pa rin daw ito sa imbestigasyon sa dahilan ng kaniyang kontrobersyal na pagkamatay.
MAKI-BALITA: ALAMIN: Pagkakaiba ng person of interest, suspek, at perpetrator
“Lahat ng mga personalities, lahat ng mga ebidensyang nandon, ay isa-subject natin under investigation. And si driver will be subjected to investigation that's why persons of interest [siya]. Unless, mai-clear na natin,” ani Nartatez.
Hindi pa tapos? Mga solon, umapelang imbestigahan pagpanaw ni ex-DPWH Usec. Cabral
Saad pa niya, “We don't want to speculate 'di ba?”
Matatandaang pumanaw si Cabral noong Huwebes, Disyembre 18 matapos umano itong mahulog sa bangin sa Kennon Road.
KAUGNAY NA BALITA: Dating DPWH Usec. Cabral, pumanaw matapos mahulog umano sa bangin
Batay sa paunang imbestigasyon ng mga awtoridad, walang senyales ng foul play ang bangkay ni Cabral ngunit nananatili pa ring bukas ang kanilang pag-iimbestiga upang matukoy pa totoo umano nitong pagpanaw.
Ang driver ni Cabral ang huli niyang nakasama bago maganap ang naturang trahedya, at siya rin ang nagsalaysay ng huling pangyayari bago raw niya iwanan ang kaniyang amo.
“Pagdating po dito ng alas-tres, bumaba po siya, nagpaiwan sa akin. Bago po naman iwan, nakaupo po siya sa may bato tas sabi n'ya balikan ko na lang siya. Pagbalik ko po siguro one hour, binalikan ko po wala na dito,” anang driver ni Cabral.
“'Di ko naman po alam na ganoon ang mangyayari,” saad niya.
Aniya “Wala naman po siyang kinukwento sa akin na kung mayroon siyang problema. Wala naman po siyang kinukwento sa akin.”
KAUGNAY NA BALITA: ‘Di ko alam na ganoon mangyayari!' Driver ni ex-DPWH Usec. Cabral, nagkomento sa pagpanaw ng amo
