Nasabat ng Philippine Coast Guard (PCG) ang umano’y rocket debris na may “Chinese markings” sa Barangay Saoit, Burgos, Ilocos Norte, nitong Linggo, Nobyembre 9.

Sa ibinahaging Facebook post ng PCG, nang masamsam nila ang naturang rocket debris, kasalukuyan din nilang isinasagawa ang isang mobile and foot patrol operation bilang paghahanda sa pagtama ng super typhoon Uwan sa lalawigan.

“At the time of the discovery, personnel from the Coast Guard Sub-Station (CGSS) Burgos were conducting mobile and foot patrol operations as part of their ‘Paalala sa Mangingisda sa Panahon ng Bagyo’ information drive in light of Super Typhoon #UwanPH. During said patrol, the team sighted suspicious debris believed to be rocket parts that had drifted ashore,” anang PCG.

“By 09:30 AM on the same date, CGSS Burgos promptly coordinated with the Municipal Disaster Risk Reduction and Management Office (MDRRMO) for the safe recovery and handling of the material,” saad pa nila.

Inabisuhan na rin daw nila ang mga lokal na mangingisda at residente na huwag munang lapitan ang naturang debris, para sa inspeksyong isasagawa ng awtoridad.

“Coast Guard personnel also issued safety advisories to local fishermen and nearby residents, urging them to keep a safe distance from the alleged rocket debris while authorities conduct assessment and validation,” pagtatapos nila.

Matatandaang kamakailan, pinuna ni Pangulong Ferdinand “Bongbong” Marcos Jr. ang umano’y kakulangan ng abiso hinggil sa pagpapalipad ng rocket ng China, na nagresulta sa pagkalat ng mga debris nito sa iba’t ibang bahagi ng bansa.

"Hindi n'yo naman kailangang agawan sa amin 'yan eh [debris], ano’ng gagawin namin diyan? So, sabihan n'yo kami kung saan dadaan yung rocket. Kung saan babagsak, at kukunin namin sa dagat tapos dadalhin namin sa inyo,” ani PBBM.

KAUGNAY NA BALITA: PBBM, binengga kulang na abiso tungkol sa rocket debris ng China: 'Anong gagawin namin diyan!'-Balita

Vincent Gutierrez/BALITA